चितवन, चैत १६ । भरतपुर महानगरपालिका पुगेका पत्रकारलाई समाचार संकलन गर्न रोकेको घटनाप्रति भरतपुर महानगरपालिकाले खेद प्रकट गर्दै अब यस्ता घटना दोहोरिन नदिने प्रतिबद्धता जनाएको छ ।
आज महानगरपालिकाद्वारा नेपाल पत्रकार महासंघसँग आयोजित संयुक्त छलफल कार्यक्रममा महानगरका प्रमुख रेनु दाहालले आउने दिनहरुमा यस्ता खालका घटना दोहोरिन नदिने भन्दै दुःख प्रकट गरेकी हुन् ।
यही चैत १३ गते भरतपुर महानगरपालिकामा उद्योग वाणिज्य संघ चितवनको टोलीले करको विषयमा ज्ञापनपत्र बुझाउने क्रममा पत्रकारहरुलाई नगरप्रमुख रेणु दाहाल र उपप्रमुख पार्वती शाहकै रोहवरमा प्रमुख प्रशासकीय अधिकृत प्रेमराज जोशी र वडा नं १० का वडाध्यक्ष अरुणपीडित भण्डारीले गालीगलौजसहित दुव्र्यवहार गरी कार्यक्रम स्थलबाट बाहिर निकालिएको थियो । सो पश्चात् पत्रकारसँग सम्बद्ध संघसंस्थाले विज्ञप्ति जारी गर्दै घटनाको भत्र्सना गरेका थिए ।
कार्यक्रममा प्रमुख दाहालले महानगर र पत्रकारबीचमा सुमधुर सम्बन्ध स्थापित गर्दै समाचार संकलनमा मद्दत पुर्याउने बताए । उक्त अवसरमा भरतपुर महानगरपालिकाका प्रमुख प्रशासकीय अधिकृत प्रेमराज जोशी र वडा नं १० का वडाध्यक्ष अरुणपीडित भण्डारीले घटनाप्रति खेद प्रकट गर्दै नियोजित नभएर आवेशमा आएको बताए ।
छलफलमा महासंघ चितवन शाखाका अध्यक्ष राधेश्याम खतिवडाले अबका दिनमा समाचार संकलनमा सहज वातावरण सिर्जना गर्न अनुरोध गर्दै यस्ता घटना पुन दोहोरिन नहुने बताए ।
कार्यक्रममा पत्रकारले महानगरबाट सूचना संकलनमा कठिनाइ हुँदै आएको भन्दै जनप्रतिनिधि आएपछि थप समस्या हुनु दुःखद् भएको बताएका थिए ।
