काठमाडौँ, चैत २० । भूकम्पपीडितको निजी आवास निर्माणका लागि राष्ट्रिय पुनःनिर्माण प्राधिकरणले दोस्रो किस्ता आगामी असार मसान्तसम्म दिने भएको छ ।
मंगलबार प्रधानमन्त्री निवास बालुवाटारमा प्रधानमन्त्री केपी शर्मा ओलीको अध्यक्षतामा बसेको प्राधिकरण निर्देशक समितिको बैठकले उक्त निर्णय गरेको हो ।
प्राधिकरणका प्रमुख कार्यकारी अधिकृत युवराज भुसालले यही चैत मसान्तसम्म दिइने निर्णय भए पनि भूकम्पपीडितको घर बनिनसकेको हुनाले २०७५ असार मसान्तसम्म आवास निर्माणका लागि दोस्रो किस्ता दिने निर्णय गरिएको बताए ।
हालसम्म एक लाख १४ हजार भूकम्पपीडितको निजी अवास निर्माण भइसकेको र तीन लाख ९० हजार निर्माणाधीन रहेको भुसालको भनाइ छ ।
पुनःनिर्माणका क्रममा भूकम्पपीडितका आवास निर्माण गर्दा जोखिममा रहेका अशक्त र अपाङ्गतायुक्तलाई प्राथमिकता दिइने विषयमा छलफल भएको थियो ।
बैठकमा निजी आवास निर्माण कार्यविधिलाई सरलीकृत गरेर काम अघि बढाइने सहमतिसमेत भएको छ ।
