रामपुर, पाल्पा, १ असार । शिक्षण पेसा छाडेर गाईपालन व्यवसायमा संलग्न रामपुर नगरपालिका–५ सानीअमराईका वासुदेव ढुङ्गाना अहिले दुध बेचेर मासिक ८० हजार आम्दानी गर्छन । दैनिक गुजारा चलाउन जागिरे जीवनलेसमस्या परेपछि शिक्षण पेसा छाडेर व्यावसायिक गाईपालनमा ढुंगाना संलग्न भएका हुन् । गाईपालन सुरु गरेपछि उनको दैनिकीमा नै आमूल परिवर्तन आयो ।
जागिरमा मात्र आबद्ध रहँदा घरव्यवहार चलाउन ठूलै समस्याको समाधान गर्नुपर्ने भएकाले ढुङ्गानाले अहिले गाईपालनबाट मनग्य आम्दानी गर्दै जनजिवनमा परिवर्तन ल्याएका छन् । पाँच वर्षसम्म शिक्षण पेसाको अनुभव लिनुभएका ढुङ्गानाले जागिर छाडेपछि एउटा स्थानीय जातको गाईबाट व्यवसाय थालनी गरेको बताउँछन् । उनको फार्ममा हाल उन्नत जातका १० वटा गाई र दुई वटा बाच्छा छन् । सो फार्मबाट दैनिक ५० लिटर दूध उत्पादन हुन्छ । जागिरले दैनिक गुजारा चलाउन निकै धौ धौ परेको थियो, छोरा छोरीको पढाइ खर्च जुटाउन निकै ठूलो समस्या भएपछि जागिर छोडेर गाईपालन सुरु गरेको हुँ, उनले भने । अहिले घरबाटै नै दूध बिक्री गर्दै घरमै बसीबसी मासिक रु ७० हजारदेखि रु ८० हजारसम्म आम्दानी भएको उनी बताउँछन् ।
ढुंगानाका अनुसार एउटा गाईबाट आठ लिटरसम्म दूध उत्पादन हुन्छ । गाईफार्म सँगसँगै दिनभरको फुर्सदको समयलाई सदुपयोग गर्दै तरकारीखेतीलाई समेत प्राथमिकता दिदै आएका छन् । कृषि क्षेत्रमा मात्र नभई सामाजिक क्षेत्रमा पनि उनी उत्तिकै सक्रिय छन् । ढुङ्गानाले मकै बालीमा राष्ट्रियस्तरको दोस्रो पुरस्कार समेत प्राप्त गरेका छन् । यो पेसा व्यवसायलाई आजिवन निरन्तरता दिने उनको अठोट छ । उन्नत जातका गाई पाल्ने ढुंगानाले सोच बनाएका छन् । उनको फस्टाउँदो व्यवसाय देखेपछि गाउँका अन्यले समेत गाईपालनबाट लाभ लिन थालेका छन् ।
जागिरे जीवन बन्धन र परिवारको गुजारा चलाउन नपुग्ने तलबमा भुलेर समय बिताउनुभन्दा कृषि व्यवसाय गरेर आफ्नै मेहनत र पाखुरीमा रमाउन सबैलाई उनको सुझाव छ । स्नातक तहसम्मको अध्ययन पूरा गरेका ढुङ्गानाले शिक्षित युवालाई जागिरमा सीमित रहनुभन्दा व्यवसाय गरेर नमुना उद्यमी बन्न हौसला प्रदान गर्दै आएका छन् । सिमित समय व्यवसायमा लगानी गर्नाले सफल उद्यमी बन्न सकिने उनको ठहर छ । विदेशको प्रलोभनमा युवाहरु विदेशिनुको सट्टा आफ्नै देशमा केही गरेमा उदाहरणीय काम गर्न सकिन्छ भन्ने उदाहरणको पात्र ढुंगााना बनेका छन् ।
