मोरङ, चैत २३ । संविधानमा सुनिश्चित भएका अधिकारलाई कार्यान्वयन गर्नका लागि अझै पनि केही ऐन तथा कानून परिमार्जन र निर्माण गर्न आवश्यक रहेको उपसभामुख डा शिवमाया तुम्बाहाम्फेले बताएकी छिन् ।
आज मोरङको उर्लाबारी नगरपालिकास्थित ध्रुवतारा महिला फेडेरेशनद्वारा आयोजित बधाई तथा सम्मान कार्यक्रममा बोल्दै उनले संविधान जारी भइसकेपछि नेपालमा तीनै तहको निर्वाचन सम्पन्न भएको र तीनै तहका सरकारलाई जोड्नका लागि केही ऐन कानून निर्माण गरिनु आवश्यक रहेको विचार व्यक्त गरिन् ।
महिलाको आन्दोलनकै कारण राज्यको प्रमुख तहमा महिला पुग्न सफल भएको जनाउँदै उनले अझै पनि धेरै आन्दोलन र अभियान चलाउन बाँकी रहेको बताएकी छिन् ।
नेपालमा महिला आन्दोलनको प्रकृति फरक रहेको भन्दै उपसभामुख तुम्बाहाम्फेले आन्दोलन भनेको महिलाको अवस्था जस्तो छ त्यसलाई परिवर्तन गरेर अगाडि बढ्न उत्प्रेरित गर्ने एउटा अभियान रहेको बताइन् ।
उनले मोरङ जिल्लामा महिला हिंसाको चपेटामा परेका महिलाको पुनःस्थापनाका लागि एउटा सुरक्षित आवास गृह निर्माणको तयारी भइरहेको जनाएकी छिन् ।
