काठमाडौँ, वैशाख ६ । तारकेश्वर नगरपालिका–२ स्थित काभे्रस्थलीमा आज भगवान् बदरीनारायणको प्राण प्रतिष्ठा कार्यक्रममा राष्ट्रपति विद्यादेवी भण्डारीले सरिक हुनाका साथै मन्दिरको उद्घाटन गरेकी छिन् ।
हिन्दू धर्मावलम्बीहरुको आस्थापुञ्जका चार धाममध्ये बदरीनारायण एक हो । शिवपुरीको काखमा अवस्थित बृहत् शान्तिधाममा बदरीनारायणको प्राण प्रतिष्ठा गरी मन्दिर तथा गोपुर तयार गरिएको हो । वि.सं २०७३ असार ३ गते मन्दिरको शिलान्यास गरिएको थियो ।
सत्यम्, शिवम्, सुन्दरम् भगवान् शिवका आदर्श वाणीअनुसार कलात्मक शैलीमा मन्दिर तयार पारिएको छ । बदरीनारायणको प्राण प्रतिष्ठासँगै बदरीनाथको दर्शन गर्न अन्यत्र जानुपर्ने अवस्थाको अब अन्त्य भएको जनाइएको छ । उक्त अवसरमा प्रदेश नं ३ का मुख्यमन्त्री डोरमणि पौडेलले बृहत् शान्तिधामलाई धार्मिक र सांस्कृतिक पर्यटकीय गन्तव्यको रुपमा विकास गर्न लागिएको बताए ।
उनले धार्मिक सहिष्णुता र एकताले नै राष्ट्रियतालाई बलियो बनाउने चर्चा गर्दै आर्थिक समृद्धिका लागि धार्मिक पर्यटनलाई जोड दिनुपर्ने धारणा व्यक्त गरे । तारकेश्वर नगरपालिकाका प्रमुख रामेश्वर बोहराले बृहत् शान्तिधाममा आन्तरिक तथा बाह्य पर्यटन प्रवद्र्धन गर्न नगरपालिकाका तर्फबाट आवश्यक सहयोग पुर्याउने बताए ।
बृहत् शान्तिधामका संस्थापक चतुर्भुचार्य चुडामणिले सनातन धर्मको रक्षा गर्न आह्वान गरे । उक्त अवसरमा भक्ति सङ्गीतसमेत प्रस्तुत गरिएको थियो ।
