काठमाडौं, बैशाख १० । मुलुकको समृद्धिका लागि पर्यटन प्रवद्र्धन गर्नुपर्ने वन तथा वातावरणमन्त्री शक्तिबहादुर बस्नेतले बताएका छन् । पर्यटन क्षेत्रमा संलग्न रहेको शिखरपोष्ट मिडिया गु्रपको चौथो वार्षिक उत्सव कार्यक्रमको उद्घाटन गर्दै मन्त्री बस्नेतले आगामी वर्षसम्म नेपाल घुम्ने पर्यटकले वातावरणको क्षेत्रमा उल्लेख्य विकास भएछ भन्ने सन्देश प्रवाह गर्न सक्ने अवस्था सिर्जना गर्ने विश्वास व्यक्त गरे ।
मुलुक र जनताको हितलाई सर्वोपरी राखी सञ्चार माध्यमले कार्य गर्नुपर्ने उनको भनाइ छ । सांसद हेमकुमार राईले विकास निर्माणमा सबैको ध्यान गएको बताउँदै नयाँ नेपालको सपना साकार पार्न सबै एकढिक्का भएर अघि बढ्नुपर्ने धारणा व्यक्त गरे । समृद्धि नारामा मात्रै नभई ठोस योजना तथा कार्यक्रममार्फत हुनुपर्ने पूर्व पर्यटनमन्त्री कृपासुर शेर्पाले बताए ।
शिखरपोष्ट मिडिया गु्रपका अध्यक्ष प्रकाश खालिङले आर्थिक समृद्धिका लागि मुलुकमै लगानीको वातावरण निर्माण गर्नुपर्नेमा जोड दिए । कार्यक्रममा मन्त्री बस्नेतले शिखरपोष्ट मिडिया गु्रपको अर्को संस्करण शिखर अनलाइन टेलिभिजनको औपचारिक शुभारम्भ गरेका छन् । उक्त कार्यक्रममा विभिन्न क्षेत्रबाट मुलुकको विकासमा योगदान पुर्याएका व्यक्ति तथा संस्थालाई सम्मान गरिएको थियो ।
