काठमाण्डौ, बैशाख ११ । छक्का पञ्जा र छक्का पञ्जा २ ले लगातार दर्शक मन जितेपछि अन्ततः ‘छक्का पञ्जा’ को तेस्रो श्रृंखलापनि सुरु हुने बतायएको छ । छक्का पञ्जा ३ का लागि लिड नायिका फाइनल गरिएको छ ।
लगातार दुई सिरिजमा अभिनेत्री प्रियंका कार्की र अभिनेता तथा लेखक दीपकराज गिरीको जोडी बाँधिएको थियो तर यसपटक भने दीपकको अपोजिटमा ‘ऐश्वर्य’ फेम अभिनेत्री दीपिका प्रसाईँ फाइनल भएकी छिन् । फिल्म ‘ऐश्वर्य’ मा उनको अभिनय र सुन्दरताको एकदमै तारिफ गरिएको थियो ।
दीपकराजले बोल्ड एन्ड ब्यूटी नायिका खोजीरहेको र उक्त खबी दीपिकामा भएर उनलाई यस चलचित्रको लागि रोजिएको प्रष्ट्याएका छन् । दशैंको फूलपातीमा प्रदर्शनमा ल्याउने गरि यस फिल्मको बैशाख १७ गतेबाट छायांकन सुरु हुने निर्माण टिमले जानकारी गराएको छ ।
‘छक्का पञ्जा’ को दुबै श्रृंखलामा अटेकी अभिनेत्री वर्षा राउत यसपटक तेस्रो भागबाट भने बाहिरिएकी छिन् । यस्तै, ‘छक्का पञ्जा २’ मा प्रमुख भूमिका निर्वाहा गरेकी अभिनेत्री स्वस्तिमा खड्का पनि यस चलचित्रमा अटाइनन् ।
नायिका प्रियंका कार्कीलाई भने विशेष भूमिका दिइने निर्माण टिमले बताएको छ । ‘छक्का पञ्जा ३’ लाई दीपाश्री निरौलाले निर्देशन गर्दै्छिन् ।
जितु नेपाल, केदार घिमिरे, वुद्दि तामाङलगायतका केही कलाकार भने यथावत रहेका छन् । पोखरा र दमौलीमा खिचिने फिल्मको छायाँकारमा पुरुषोत्तम प्रधान छन् । हेरुम यस चलचित्रले कतिको दर्शकको मन जित्न सक्ने छ । दुवै श्रंखलाजस्तो छ अलि भिन्न छ त्यो त रिलिजपछि नै थाहा हुनेछ ।
