काठमाडौं, ५ असार । गत शुक्रबारबाट रिलिजमा आएको चलचित्र ‘तारेभीर’ले दर्शकहरुको राम्रो साथ पाईरहेको छ । ‘तारेभीर’ मोफसलका ३७ वटा हल र काठमाडौं उपत्यकाको ११ वटा हलमा प्रदर्शन भएरहेको छ । उक्त चलचित्रले सोचे अनुसारको दर्शकहरुको ध्यान तान्न सफल भईरहेको छ ।
समाजमा हुने विभिन्न अपराधिक घटनाहरुलाई नेपाल प्रहरीले कसरी निर्मुल पार्न सक्छन् भन्ने कुरालाई यस चलचित्र मार्फत उतारिएको छ । सो चलचित्रमा महिला प्रहरी अधिकृतलाई सशक्त रुपमा प्रस्तुत गरिएको छ, जसले हाम्रो समाजमा रहेका महिलाहरुलाई अघि बढ्नको लागि प्रेरणा मिल्छ । यस चलचित्र मार्फत नयाँ कलाकारहरुलाई पर्दामा ल्याइएको छ । नयाँ कलाकारहरु अभिनित भएपनि ‘तारेभीर’ मा सबै कलाकारहरुले आ–आफ्नो भूमिकालाई चलचित्रको कथा अनुसार बाँध्न सफल भएका छन् ।
निर्देशक प्रेम सुब्बाले समसामयिक बिषय वस्तुलाई ‘तारेभीर’ चलचित्रमा प्रश्रय दिई उत्कृष्टता रुपमा पर्दामा प्रस्तुत गर्न सफल भएका छन् । सो चलचित्रले नेपाल प्रहरी प्रशासनको सकारात्मक पक्षलाई सशक्त रुपमा व्याख्या गरेको छ । चलचित्र हेरीसकेका अधिकांश दर्शकहरुले ‘तारेभीर’ को बिषयबस्तु उत्कृष्ट बनेको बताउँदै एक पटक सबैले ‘तारेभीर’ हेर्नुपर्ने बताएका छन् । फिल्मको कथा र निर्देशन प्रेम सुब्बाको रहेको छ । फिल्ममा बिष्णु चेमजोङ, रेखा फागो, नविन कार्की, प्रेम सुब्बा, देउ कृष्ण देवान लगाएतको मुख्य भुमिका रहेको छ ।
