रोल्पा, जेठ १ । रोल्पाका दुई छुट्टाछुट्टै स्थानमा आगोलागी हुँदा लाखौँको धनमाल नष्ट भएको छ ।
आगलागीबाट चार परिवार घरवारविहीन हुन पुगेका छन् । त्रिवेणी गाउँपालिका–४ जुगारमा आइतबार बेलुका भएको आगलागीमा परी तीन घर जलेर नष्ट भएका छन् ।
स्थानीय हरि परियारको गोठबाट सल्केको आगोले हरि परियार, रमेश परियार र नन्दबहादुर पुनको घर जलेर नष्ट भएको प्रहरीले जनाएको छ । उक्त आगलागीबाट रु १० लाख बढीको क्षति भएको जानकारी गराइएको छ ।
प्रहरी र स्थानीयवासीको सक्रियतामा आगो नियन्त्रणमा आएपछि थप क्षति भने हुन नपाएको प्रहरीले जनाएको छ । उता रोल्पा नगरपालिका–७ माडीचौरमा समेत एक घर आगलागी हुँदा रु १० लाख बढीको क्षति भएको थियो ।
स्थानीय वर्मता पुनको कच्ची घरमा भएको आगलागीबाट अन्न, लत्ताकपडा, काठपातसमेतको धनमाल जलेर नष्ट भएको प्रहरीले जानकारी दिएको छ । फुसले छाएका घरको संख्या धेरै हुने भएकाले रोल्पामा हरेक वर्ष आगलागीका घटना हुने गर्दछ ।
