काठमाडौँ, जेठ १ । नेपाल र चीनको सीमामा पर्ने हुम्लाको ‘हिल्सा नाका’ को कर्णाली विकास आयोगले अध्ययन गर्ने भएको छ ।
हिल्साको बाटो हुँदै चीनको मानसरोवर जाने आउने गरिने भएकाले त्यस क्षेत्रमा हुने कारोबारलाई व्यवस्थित र मर्यादित बनाउनका लागि उक्त अध्ययन गरिने भएको हो । विज्ञका रुपमा आयोगले डा. हरि रोकालाई चयन गरिसकेको छ ।
सो स्थानमा पाइने प्राकृतिक सौन्दर्य, स्थानीय सम्पदा क्षेत्रलगायतको संरक्षण गरी पर्यटकीयस्थलका रुपमा विकास गर्ने लक्ष्य लिएर अगाडि बढिएको छ ।
कर्णाली करिडोरका रुपमा कालीकोटको मान्मा—सिमीकोट— हिल्सा सडकखण्ड विकास हुन लागेका कारण त्यस क्षेत्रमा भन्सारको व्यवस्था गरी राजस्व विस्तार गर्ने अध्ययनको उद्देश्य रहेको छ ।
त्यहाँ हुने चोरी निकासीलाई निर्मूल गर्नका लागि पनि नाका क्षेत्रका विभिन्न स्थानमा भन्सारको व्यवस्था गर्न सोही अध्ययनमार्फत सुझाव दिइनेछ ।
करीब रु सात लाखको लागतमा सम्पन्न गरिने सो अध्ययन चालू आर्थिक वर्षभित्रै पूरा हुने आयोगका सूचना अधिकारी मोहनप्रसाद न्यौपानेले बताए ।
