जनकपुरधाम, जेष्ठ १ । वर्तमान सरकारमा आन्तरिक धमिरा लाग्न शुरू भइसकेको नेपाली कांग्रेसका उपसभापति विमलेन्द्र निधिले बताएका छन् । कांग्रेस धनुषाको १३ औँ अधिवेशनको उद्घाटनका क्रममा उनले सरकारमाथि भरोसा गर्ने अबस्था नरहेको सङ्केत गरेका छन् ।
उपसभापति निधिले सरकारको क्रियाकलापले संघीय संरचना र संविधानमाथि खतरा उत्पन्न हुन थालेको बताउँर्दैै सरकारले देशभक्ति र राष्ट्रियतालाई चाकडीमा परिणत गरिसकेको आरोप समेत लगाएका छन् । कांग्रेस लोकतन्त्रको सुरक्षाको गार्ड भएको चर्चा प्रष्ट पार्दै उनले लोकतन्त्रको रक्षा सन्दर्भमा कतिपय अवस्थामा कांग्रेसलाई हार भए पनि लोकतान्त्रिक प्रणालीको रक्षा गर्नमा सफल भएकाले निराश नभई संगठित हुनु जरूरी रहेको प्रष्ट्याए ।
उपसभापति निधिले प्रदेश नं २ को सरकारले भारतीय प्रधानमन्त्री नरेन्द्र मोदीको नागरिक अभिनन्दन समारोहमा आन्तरिक समस्या प्रस्तुत गरेर आफ्नो कमजोरी प्रदर्शन गरेको उल्लेख गर्दै संविधान संशोधनको कुरा मोदीलाई होइन, प्रधानमन्त्री केपी शर्मा ओलीसमक्ष राख्नुपर्ने बताए ।
कार्यक्रममा काँग्रेस केन्द्रीय सदस्यहरू आनन्दप्रसाद ढुंगाना र महेन्द्र यादव, पूर्वमन्त्री रामकृष्ण यादव, सांसदद्वय स्मृतिनारायण चौधरी र मीनाक्षी झालगायतले अन्तरघात, स्वेच्छाचारिता, गुट, संकीर्णता, विभेद र अनुशासनहीनताले कार्यकर्तामा चिन्ता र निराशा बढ्दै गएको प्रति दुःख व्यक्त गरे ।
