काठमाडौं, ६ जेठ । भूकम्पपीडित १४ जिल्लाका भूकम्प अतिप्रभावित क्षेत्रका जनताले भरेको आवेदनका अनुसार असार ७ र ८ र ९गते पन्ध्रसय थान ट्याक्सीको नम्बर प्लेट प्रदान गरिदै छ । ट्याक्सीका लागि आवेदन दिएका मध्येबाट गोला प्रथामार्फत १५ सय जनालाई ट्याक्सीको प्लेट दिइने निर्णय भएको छ ।
जिल्लागत रुपमा छुट्याएर तीन दिन लगातार गोलाप्रथा गर्न लागिएको यातायात ब्यवस्था विभागले जनाएको छ । यसअघि नै भूकम्पपीडितलाई यातायात ब्यवस्था विभागले ट्याक्सी वितरण गर्न आवेदन मागेको थियो । विभागका प्रवक्ता डा. टोकराज पाण्डेले सार्वजनिक रुपमा कार्यक्रम गरेर गोलाप्रथा गरिने जानकारी गराएका छन् । ट्याक्सी वितरण गोलाप्रथा कार्यक्रमलाई टिभीमार्फत कार्यक्रमको प्रत्यक्ष प्रशारण गर्न लागिएको यातायात व्यवस्थापन विभागले जनाएको छ । आवेदक मध्येबाट भाग्यसाली १५ सय जना पीडितले स्वरोजगरीका लागि ट्याक्सीको नम्बर प्लेट पाउने भएका छन् । बितेको साउन ५ देखि भदौ ५ सम्म एक लाख ४९ हजार पाँच सय ५८ भूकम्पपीडितले ट्याक्सीका लागि आवेदन दिएका मध्येबाट गोलाप्रथा मार्फत पन्ध्र सयले मात्र ट्याक्सी नं प्लेट पाउने भएका छन् ।
विनासकारी महाभूकम्पका कारण क्षत विक्षत बन्न पुगेका १४ जिल्ला दोलखा, गोरखा, सिन्धुपालचोक, काभ्रेपलाञ्चक, रसुवा, धादिङ, नुवाकोट, भक्तपुर, काठमाडौ, ललितपुर, मकवानपुर, सिन्धुली, रामेछाप र ओखलढुङ्गाका भूकम्पपीडितहरुले आवदेन फारम दर्ता गराएका थिए । यातायात विभागले ट्याक्सीको नम्बर प्लेट मात्रै उपलब्ध गराउने र ट्याक्सी खरिदमा कुनै सहुलियत वा अनुदान नदिइने जानकारी गराएको छ । नेपाल सरकारले भूकम्प पीडितहरुलाई लक्षित गर्दै काठमाडौंमा १५ सय नयाँ ट्याक्सी वितरण गर्ने निर्णय गरिसकेको छ । सोही अनुरुप सात देखि नौ गते सम्म ट्याक्सीका नम्बर वितरण गरिदै छ । भूकम्पपीडितहरुलाई स्वरोजगार बनाउन सरकारले २०७२ जेठमा नै ट्याक्सीको दर्ता खुलाउने निर्णय गरेको थियो ।
अब अहिलेकाभन्दा गुणस्तर र क्षमताभन्दा कम नहुने गरी १५ सय थान ट्याक्सी वितरण गर्न लागिएको यातायात विभागले जानकारी गराएको छ ।
