भीमदत्तनगर, जेठ १ । यही साता आयोजना हुने पल्सर स्पोर्टस् अवार्डको मनोनयन २०७४ को उत्कृष्ट पुरुष खेलाडी, युवा खेलाडी र प्रशिक्षकमा प्रदेश नं ७ सुदूरपश्चिमबाट एक प्रशिक्षकसहित तीन खेलाडी छनोट भएका छन् ।
सो मनोनयनमा क्रिकेटका प्रशिक्षक जगत टमाटाँंगै ब्याडमिन्टनका दीपेश धामी, क्रिकेटका दीपेन्द्रसिंह ऐरी र बक्सिङकी पुनम रावल मनोनयनमा परेका छन् । नेपाललाई ऐतिहासिक वान डे इन्टरनेशनल मान्यता दिलाउने क्रिकेट प्रशिक्षक टमाटा यहाँको पहाडी जिल्ला अछामका बासिन्दा हुन् ।
उनको बसोबास पछिल्लो समय कैलालीको टीकापुरमा छ । उनको प्रशिक्षणमा नेपाली क्रिकेट टिमले आइएसिसी विश्वकपलगायत थुप्रै अन्तर्राष्ट्रिय खेलमा विजयी हुन सफल भएको खेलकूद इतिहास छ । त्यसैगरी वर्षको उत्कृष्ट पुरुष खेलाडीमा ब्याडमिन्टनका धामी मनोनयनमा परेका छन् ।
कञ्चनपुरको भीमदत्तनगरपालिका–६ ऐठपुर घर भएका उनले हाल सशस्त्र प्रहरी बल (एफिएफ क्लब) मा आबद्ध भएर विभिन्न राष्ट्रिय तथा अन्तर्राष्ट्रिय खेलकूद प्रतियोगितामा भाग लिँदै आएका छन् । योनेक्स सनराइज पाकिस्तान इन्टरनेशनल सिरिजमा शोभा गौचनसँगै मिक्स डबल्सको उपाधि विजेता, सोही प्रतियोगितामा मेन्स सिङ्गल्समा क्वाटरफाइनल पुग्ने एक्लो नेपाली खेलाडी धामी घरेलु प्रतियोगितामा समेत स्वर्णधारी खेलाडी हुन् ।
उनका बुबा हरेकसिंहसमेत भलिबलका खेलाडीका रुपमा परिचित छन् । राष्ट्रिय खेलकूद परिषद्का पूर्वकेन्द्रीय सदस्य हरेकसिंह हाल भीमदत्तनगरपालिका–६ को वडाध्यक्षसमेत हुन् । उनले छोरा धामीलाई खेलजगत्मा स्थापित गराउन मुख्य भूमिका निभाउँदैछन् ।
त्यसैगरी भीमदत्तनगरपालिका–१८ कटानका क्रिकेट खेलाडी ऐरी वर्षको युवा खेलाडीको मनोनयमा छन् । नेपाली टिम एसीसी यू–१९ एसिया कपको सेमिफाइनलमा पहिलो पल्ट पुग्दाका ऐरी कप्तानको भूमिका थिए । विभिन्न अन्तर्राष्ट्रियस्तरका खेलमा उत्कृष्ट प्रदर्शन गरेका खेलाडी ऐरीले हाल नेपाली राष्ट्रिय क्रिकेट टिमबाट खेललाई निरन्तरता दिँदै आएका छन् ।
त्यसैगरी सुदूरपश्चिमको विकट पहाडी जिल्ला बाजुरामा जन्मिएकी बक्सिङ खेलाडी रावल पनि युवा खेलाडीमा मनोनयनमा परेकी छिन् । विनाप्रशिक्षक बक्सिङ सिकेकी रावल छोटो समयमा खेककूद क्षेत्रमा आफुलाई परिचित गराउन सफल खेलाडी हुन् । केही समयअघि इण्डियन ओपन बक्सिङमा ६४ केजीमुनि स्पर्धामा कास्य पदक जितेर चर्चामा कमाएकी उनी हाल नेपाली सेनाको त्रिभुवन आर्मी क्लबमा आबद्ध रहेकी छिन् । पुनमसँगै विमला श्रेष्ठ र प्रशिक्षकमा प्रकाश थापामगर समेत अवार्ड मनोनयनमा परेका छन् ।
बक्सिङ ओलम्पियन डम्बरदत्त भट्टले भने– यो बक्सिङका लागि सुखद् कुरो हो । नेपाल खेलकूद पत्रकार मञ्चले आयोजना गर्ने सम्मानका आठ विधामध्ये पाँच विधाको मनोनयन हुने परम्परा छ । तीमध्ये पिपुल्स च्वाइस अवार्ड यसअघि नै सार्वजनिक भइसकेको छ । सुदूरपश्चिम खेलकूदका लागि उर्वरभूमि रहेको भन्दै बक्सिङ प्रशिक्षक समेत रहेका भट्टले सुदूरपश्चिम हरेक खेल गतिविधिमा अगाडि रहेको बताए । खेलाडी/प्रशिक्षक मनोनयनले खेलाडीमा थप हौसला मिलेको उनको भनाइ छ ।
यस प्रकारका अवार्डले खेलाडीलाई प्रदर्शनमा थप हौसला मिल्ने उनले बताए । मनोनयनमा परेका ब्याडमिन्टन खेलाडी धामीले पहिलो पटक मनोनयनमा परेको भन्दै खुशी जनाए । मनोनयन र सम्मानले खेलाडीलाई खेल प्रदर्शनमा थप हौसला पुग्नुका साथै बल पुग्ने बताउँदै धामीले भने खेलाडीका लागि यो अत्यन्तै सुखद पक्ष हो ।
त्यसैगरी कबड्डीका मुख्य प्रशिक्षक तारासिंह भाटले एउटै प्रदेशबाट तीन खेलाडी पर्नु यहाँका लागि सफल पक्ष भएको बताए । मनोनयनले अरु खेलाडीमा पनि मेहनत गर्ने हौसला मिल्ने उनको भनाइ छ ।सुदूरपश्चिममा पनि प्रतिभावान् धेरै खेलाडी जन्मिसकेका मुख्य प्रशिक्षक भाटले बताए ।
