काठमाडौँ, जेष्ठ ६ । काठमाडौँ क्रिकेट ट्रेनिंग सेन्टरले रोयल राइजिंग क्रिकेट क्लबलाई ८ रनले पराजित गर्दै जित हासिल गरेको छ । टस हारेर ब्याटिंग गरेको काठमाडौँ क्रिकेट ट्रेनिंग सेन्टरले ( केसीटिसी ) निर्धारित २० ओभरमा सबै विकेट गुमाएर १४० रन बनाएको थियो ।
खराब सुरुवात गरेको केसीटिसीले सुरुवाती ५ विकेट मात्र ३२ रनको स्कोरमा गुमाएको थियो । छैठौ विकेटको लागि बिपिन आचार्य र बिबेक राना मगरले ७६ रनको साझेदारी गर्दै टिमको स्कोर १०० रन पार गराएका थिए । बिपिनले ५७ रन तथा बिबेकले ४५ रनको इनिंग खेले जुन क्रममा बिपिनले ३९ बलमा ७ चौका र १ छक्का तथा बिबेकले ३९ बलमा ४ चौका र २ छक्का प्रहार गरे ।
रोयल राइजिंगका बलर प्रकाश जैसीले ३ विकेट तथा बिबस सिरी र विजय बिस्टले समान २र२ विकेट हात पारे । लक्ष्य पछ्याउने क्रममा रोयल राइजिंगले पुरा २० ओभर ब्याटिंग गरेपनि ८ विकेट गुमाएर १३२ रन मात्रै बनाउन सफल भयो । राइजिंगको लागि ओपनिङ्ग ब्यट्सम्यान प्रकाश जैसीले सर्वाधिक ५६ रन बनाउने क्रममा ४७ बलमा ९ चौका र १ छक्का प्रहार गरे पनि जितको लागि पर्याप्त हुन सकेन ।
केसीटिसीका बलर आदील खानले सर्वाधिक ३ विकेट र संजय बस्नेतले २ विकेट हात पारे । खेलको प्लेयर अफ द म्याच बिपिन आचार्य घोषित भए ।
