वर्तमान नेकपा नेतृत्वको सरकारका काम कारवाहीप्रति नेपाली कांग्रेसका केन्द्रीय सदस्य प्रदीप पौडेलले असन्तुष्टि व्यक्त गरेका छन् ।
एमाले र माओवादी एकताको आडमा सरकारले दुई तिहाईक ‘दम्भ’ देखाएको उनको भनाइ छ । आइतबार नेपाल तरुण दल कास्कीको भेलामा बोल्दै उनले एकताको आडमा सरकारले गलत काम गरे आफूहरूले कडा प्रतिवाद गर्ने बताएका छन् ।
गृह प्रशासन हुकुमी शैलीमा अघि बढेको भन्दै उनले भने ‘सडक निर्माणमा ढिलासुस्ती गर्ने निर्माण व्यवसायीलाई कारवाही गर्ने अधिकार भौतिक पूर्वाधार मन्त्रालयलाई छ । तर, यसलाई बेवास्ता गर्दै गृहमन्त्रीको हुकुमी शैलीमा भनाइ आउनु राम्रो होइन ।
गल्ती गर्नेलाई कानून अनुसार नै कारवाही गर्नुपर्नेमा उनले जोड दिए । फौजदारी अभियोग लागेका सांसदलाई नियमावली अनुसार नभई ऐन कानूनमार्फत् नै कारवाही गर्न उनले अनुरोध गरेका छन् ।
कांग्रेस पुरानै शैलीबाट अघि बढ्न नसक्ने भन्दै उनले पार्टीले जिम्मेवार प्रतिपक्षको भूमिका निर्वाह गर्दै आगामी निर्वाचनमा बहुमत ल्याउने गरी संगठन सुधार गर्नुपर्ने कुरामा जोड दिएका छन् ।
