मनाङ, जेठ ११ । चिनीयाँ कम्पनीले बेँशीसहर–चामे सडकखण्डको स्तरोन्नतिको काम गर्ने भएको छ ।
उक्त कम्पनीले एक सय ४० मेगावाटको क्षमताको तल्लो मनाङ मस्र्याङ्दी जलविद्युत् आयोजनाको काम लिएपछि सडक स्तरोन्नति पनि आफैले गर्ने भएको हो ।
आयोजनाको ठूल्ठूला सवारी साधन चलाउनुपर्ने तथा सडक साँघुरो भएका कारण चिनीयाँ कम्पनी आफैले सडक स्तरोन्नति गर्ने निर्णय गरेको तल्लो मनाङ मस्र्याङ्दी जलविद्युत् आयोजनाका जनसम्पर्क अधिकृत अमृत घलेले जानकारी गराएका छन् ।
बेँशीसहर–चामे सडक स्तरोेन्नतिको काम २०७४ भदौदेखि थाल्ने सम्झौता भएको थियो । सो कार्य कान्छाराम कन्सल्टेन्सीलाई रु २२ करोडमा ठेक्का दिइएको थियो ।
उक्त कन्सल्टेन्सीले सझौता अनुसार सडक मर्मतको काम गरिरहेको अवस्थामा सडक डिभिजन कार्यालय दमौलीले काम गर्न रोक लगाएको छ ।
वि.सं २०७५ असार मसान्तसम्ममा काम सम्पन्न गरिसक्ने सम्झौता अनुसार काम थालेको सडक स्तरोन्नतिको काम २०७४ फागुनदेखि सडक डिभिजन कार्यालयले रोक्का गरेको थियो ।
उक्त कार्यको चिनीयाँ कम्पनीले सडक डिभिजनसँग सम्झौता गर्न बाँकी रहेको सडक डिभिजन कार्यालय दमौलीका प्रमुख भानु जोशीले जनाए ।
जेठ मसान्तसम्म चिनीयाँ कम्पनीसँग सम्झौता हुने उनले बताएका छन् ।
