राजविराज, जेठ ११ । स्थानीय तह र प्रदेशलाई प्रादेशिक अधिकार नदिएसम्म संघीयता संकटमा रहने संघीय समाजवादी फोरम नेपालका अध्यक्ष उपेन्द्र यादवले बताएका छन् ।
जनताको बलिदानीबाट प्राप्त भएको संघीयतालाई जोगाउनुपर्ने अध्यक्ष यादवको भनाइ छ ।
स्थानीय तहलाई स्वायत्तता तथा प्रदेशलाई प्रादेशिक अधिकार नदिएसम्म संघीयता संकटमा रहने भन्दै उनले मधेशी जनतामाथि असमानता र विभेद कायमै रहेको आरोप लगाएका छन् ।
वर्तमान सरकारले गरेको राजनीतिक नियुक्तिमा मधेशीको सहभागिता नरहेको भन्दै अध्यक्ष यादवले हरेक क्षेत्रमा समान अवसर तथा जनसंख्याको आधारमा सहभागिता हुनुपर्नेमा जोड दिए ।
उनले मधेशी, आदिवासी, जनजातिसहित मुलुकका हरेक जनतालाई समृद्व बनाउन संविधान संशोधन आवश्यक रहेको औंल्याएका छन् ।
अध्यक्ष यादवले प्रदेश नं २ समृद्व नभएसम्म मुलुक समृद्ध बन्न नसक्ने भन्दै प्रदेश नं २ का जनता अधिकार सम्पन्न, आर्थिक रुपले समृद्व भएमात्र पूरै नेपाल समृद्ध हुने धारणा व्यक्त गरेका थिए ।
