गणतन्त्र दिवसमा संयुक्त विद्यार्थी संगठनले गर्यो प्रभातफेरी

काठमाडौँ, जेठ १५ । ११ औँ गणतन्त्र दिवसको अवसरमा आज बिहान संयुक्त विद्यार्थी संगठनले प्रभातफेरीको आयोजना गरेका छन् ।

भृकुटीमण्डपबाट निकालिएको प्रभातफेरी पुतलीसडक हुँदै शान्तिबाटिका पुगेर कोणसभामा परिणत गरिएको थियो ।

उक्त प्रभातफेरीमा विद्यार्थीले ‘गणतन्त्र दिवस जिन्दावाद’, ‘गणतन्त्रको उपहार शिक्षा, स्वास्थ्य र रोजगार’ ,‘वीर शहीद, अमर रहून्’, ‘गणतन्त्रको उपहार सुखी नेपाली, समृद्ध नेपाल’ जस्ता मूल नारा लेखिएका प्ले कार्ड बोकेका थिए ।

प्रभातफेरी कार्यक्रममा नेवि संघ अध्यक्ष नैनसिंह महर, अखिल (क्रान्तिकारी) का अध्यक्ष रञ्जित तामाङ, अनेरास्ववियुका उपाध्यक्ष सुनिता बराल, अखिल (छैटौँ) का अध्यक्ष विमल पोखरेललगायतले गणतन्त्र ल्याउनमा विद्यार्थीको महत्वपूर्ण भूमिका रहेको भन्दै गणतन्त्रले शहीदका सपना पूरा गर्नुपर्ने बताएका थिए ।