औद्योगिक क्षेत्रमा लगानी गर्न आपूर्तिमन्त्रीको आग्रह

काठमाडौं, जेठ १६ । कतारसँग रुग्ण उद्योग पुनःस्थापना र अन्य औद्योगिक क्षेत्रमा लगानी गर्नका लागि उद्योग, वाणिज्य तथा आपूर्तिमन्त्री मातृकाप्रसाद यादवले अनुरोध गरेका छन् ।

उनले नेपालका लागि कतारका राजदूत युसुफ बिन महमद अल हेयलसँगको बुधबारको शिष्टाचार भेटमा कतारमा कार्यरत चार लाख नेपालीको सुरक्षा र अधिकारका विषयमा चासो देखाएका थिए । उक्त अवसरमा कतारी राजदूत हेयलले कतारका लगानीकर्ता नेपालमा लगानी गर्न इच्छुक रहेकाले द्विपक्षीय लगानीका सम्झौता गरेर अगाडि बढ्न आग्रह गरेका थिए ।

उनले कतारले वैदेशिक लगानीका लागि जग्गा, प्रवेशाज्ञा एवं अन्य सुविधा उपलब्ध गराउँदै आएकाले नेपालले पनि जग्गासहित अन्य आवश्यक मद्दत गरिदिनसमेत अनुरोध गरे ।

नेपालले कतारमा चिया, कफी एवं हाते कागज निर्यात गर्दै आइरहेको बताइएको छ ।