काठमाण्डौ, जेष्ठ १७ । गत वर्ष रिलिज भएको प्रदीप खड्का र जसिता गुरुङ्ग अभिनित चलचित्र ‘लिलिबिलीलाई दर्शकले निकै नै मन पराएका थिए । यस चलचित्रका निर्माता तथा वितरक गोविन्द शाहीले संयूक्त रुपमा निर्माण गर्न लागेको अर्को प्रोजेक्टको (चलचित्र) नाम तय भएको छ । प्राप्त जानकारी अनुसार, उज्जवल घिमिरेले निर्देशन गर्ने फिल्मको नाम ‘लभ स्टेशन’ राखिएको निर्माण टिमले जनाएको छ ।
यस चलचित्रमा प्रदीप खड्काले लिड रोल गर्दैछन् भने लिलिबिलीकी अभिनेत्री जसिता गुरुङको प्रमुख भूमिका रहने छ । स्रोतका अनुसार, अहिले अभिनेत्री साम्राज्ञी राज्यलक्ष्मी शाहसँग पनि कुरा भइरहेको छ । यस चलचित्रमा तीन अभिनेत्रीको लिड रोल रहने खबर प्राप्त छ ।
जसितासँग प्रदीप दोस्रो पटक काम गर्दैछन् । यो चलचित्रपछि अभिनेत्री गुरुङलाई नेपाली फिल्म क्षेत्रले निकै नै सम्भावना बोकेको नायिकाको रुपमा हेरेको छ । फिल्मको रिलिज डेट फागुन २४ लाई पक्का गरिएको छ । प्रदीप अहिले गोपीकृष्ण ब्यानरको फिल्म ’रोजी’ मा व्यस्त छन् । यस फिल्मको सुटिङ सकिए लगत्तै ’लभ स्टेशन’ को छायांकनको प्रारम्भ हुनेछ । अहिले स्क्रिप्टको फाइनल ड्राफमा काम हुँदै छ ।
गोविन्दको काफिया फिल्मस् र प्रदीपको ब्यानर प्रदीप मिडिया प्रा.लि. बाट यो फिल्म निर्माण हुनेछ । प्रदीपले यसअघि ’स्केप’ र ’ठूलोमान्छे’ नामक फिल्म निर्माण गरेका थिए । यी दुबै फिल्म बक्सअफिसमा असफल रहे । उनलाई ‘प्रेमगीतले एकाएक सफल बनाएपछि उनी अहिलेका डिमान्डेड हिरोको रोजाइमा छन् ।
