काठमाडौ, जेठ १८ । खेलकुद क्षेत्रको तर्फबाट बिहीबार राष्ट्रपति विद्यादेवी भण्डारीलाई अभिनन्दन गरिएको छ ।
राष्ट्रपति भण्डारीलाई युवा तथा खेलकुद मन्त्री जगतबहादुर सुनार (विश्वकर्मा) को नेतृत्वमा राष्ट्रिय खेलकुद परिषद् (राखेप) का सदस्य–सचिव केशवकुमार विष्टलगायतका पदाधिकारी र विभिन्न राष्ट्रिय खेल संघका प्रतिनिधिसहितको उपस्थितिमा अभिनन्दन गरिएको हो । खेलकुद मन्त्री विश्वकर्मा र सदस्य–सचिव केशवकुमार विष्टले राष्ट्रपति भण्डारीलाई अभिनन्दन पत्र प्रदान गरेका हुन् ।
उक्त अवसरमा नेपाल एथलेटिक्स संघ, नेपाल हक्की संघ, नेपाल ब्याडमिन्टन संघ, नेपाल टेनिस संघ, अखिल नेपाल टेबलटेनिस संघ, अखिल नेपाल फुटबल संघ, नेपाल पौडी संघ, नेपाल आर्चरी संघ, नेपाल बक्सिङ संघ, नेपाल भलिबल संघ, नेपाल जुडो संघ, नेपाल गोल्फ संघ, नेपाल बुद्धिचाल संघ, नेपाल खो खो संघ, नेपाल कबड्डी संघ, नेपाल भारोत्तोलन संघ, नेपाल सुटिङ संघ, नेपाल कराते महासंघ, नेपाल तेक्वान्दो संघ, नेपाल सेपाकताक्रो संघ, नेपाल उसु संघ, नेपाल बास्केटबल संघ, नेपाल शारीरिक सुगठन तथा फिट्नेस संघ, नेप्लिज फेडेरेसन अफ बडि बिल्डिङ एन्ड फिट्नेस, पर्वतीय खेलकुद महासंघ, नेपाल साइक्लिङ संघ, नेपाल मोर्डन पेन्टाथलन संघ, नेपाल पारा ओलम्पिक कमिटी, नेपाल योग खेलकुद संघ, नेपाल राष्ट्रिय तथा अन्तर्राष्ट्रिय खेलाडी संघ, नेपाल खेलाडी तथा प्रशिक्षक संघ, नेपाल कुराँस संघ र काठमाडौं जिल्ला खेलकुद विकास समितिका पदाधिकारीहरुले राष्ट्रपति भण्डारीलाई मायाको चिनो समेत प्रदान गरेका थिए ।
सोही कार्यक्रमलाई सम्बोधन गर्दै राष्ट्रपति भण्डारीले अन्तर्राष्ट्रिय जगतमा ख्याती कमाउने क्षेत्र भएकाले खेलकुद राष्ट्रिय जीवनको महत्वपूर्ण अंग भएको विचार प्रस्तुत गरिन् । उनले राष्ट्रिय खेलकुद परिषद्ले राम्रो काम गरिरहेको भन्दै विद्यालय खेलकुद र पूर्वाधारमा अझ बढी ध्यान दिन आवश्यक रहेको बताएकी छिन् ।
खेलकुदमा झै राजनीतिमा पनि नियम पालना गर्नु पर्छ भन्ने चर्चा हुने गरेको स्मरण गर्दै खेलकुदले मानिसलाई अनुशासन पालनामा राख्ने काम पनि गरेको उनको भनाइ छ ।
खेलकुद मन्त्री विश्वकर्माले खेलकुदमा रहेको विवाद र समस्याको समाधान गर्दै खेल क्षेत्रलाई अगाडि बढाउनका लागि मन्त्रालय प्रयासरत रहेको बताए ।
सदस्य–सचिव विष्टले राष्ट्रपतिले खेलकुदमा देखाएको माया, स्नेह र अधिकतम् सदभावको कदर स्वरुप उनलाई सिंगो खेलकुद क्षेत्रको तर्फबाट अभिनन्दन गरिएको बताए ।
