काठमाडौं, जेठ १७ । साउन ४ गतेबाट प्रदर्शनमा आउने चलचित्र ‘पण्डित बाजेको लौरी’ को आइटम गीत सार्वजनिक गरिएको छ ।
अभिनेत्री तथा भिजे सन्ध्या केसीको फिचरिङ रहेको यस चलचित्रको चालीको तुना बोलको गीत बिहीवार राजधानीमा एक कार्यक्रमका बीच सार्वजनिक गरिएको हो । उक्त गीतमा सन्ध्या बोल्ड देखिएकी छिन् ।
यसमा मरिश्का पोखरेल, भोलाराज सापकोटा, प्रविन खतिवडा, विजय बराल, प्रमोद अग्रहरीलगायतका कलाकार पनि फिचरिङमा देखिन्छन् । कृष्ण केसीको शब्द, श्रीकृष्ण बम मल्लको संगीत रहेको गीतमा मिना निरौला र श्रीकृष्णको स्वरमा सजिएको छ । गीतका कोरियोग्राफर विक्रम स्वाँर हुन् ।
अधृत फिल्मस् प्रालीको ब्यानरमा थमनकुमार भण्डारी (राज) र किशोर खड्काले संयुक्त रुपमा निर्माण गरेको ‘पण्डित बाजेको लौरी’ चलचित्रमा एउटा सानो गाउँमा पण्डित्याईको भिन्न–भिन्न काम गर्ने पण्डितहरुको कथावस्तु समेटिएको छ ।
उक्त चलचित्रमा भोलाराज सापकोटा, प्रविन खतिवडा, विजय बराल, प्रमोद अग्रहरी, मरिश्का पोखरेल, सन्ध्या केसी, लोकेन्द्र लेखक, विशाल पहारी, कुलदीप अधिकारी लगायतका कलाकारको अभिनय देख्न सकिन्छ । यसमा विजय बराल ‘बादी’ र सन्ध्या केसी ‘बदिनी’ को भूमिकामा देखिएका छन् ।
निर्देशक दीपक ओलीले बादी जातीको कथालाई पनि यस चलचित्रमा प्रस्तुत गरिएको बताएका छन् । तल्लो जात भनेर हेपिने बदिनी र समाजमा ठूलो जात भनिने पण्डितबीचको सम्बन्धलाई यसमा देखाउन खोजिएको उनले जनाएका छन् ।
महेश दवाडीको कथा, पटकथा र संवाद, विदुर गिरीको छायांकन, मित्र डि. गुरुङको सम्पादन, विक्रम स्वाँर र दीपकमान सिंहको कोरियोग्राफी र श्रीकृष्ण बम मल्लरअमित श्रेष्ठको संगीत रहेको छ ।
