प्राविधिक गडबढी नभए पाँच दिनभित्र एसइईको नतिजा आउने

भक्तपुर, असार ४ । माध्यमिक शिक्षा परीक्षा अर्थात एसइई परीक्षाको नतिजा एक साताभित्र सार्वजनिक हुने परीक्षा नियन्त्रण कार्यालय सानोठिमीले बताएको छ ।

परीक्षा नियन्त्रण कार्यालय सानोठिमीले गत चैत दोस्रो साता लिएको परीक्षाको नतिजा सार्वजनिक गर्ने अन्तिम तयारी भइरहेको परीक्षा नियन्त्रण कार्यालयले जानकारी गराएको छ ।

सबै उत्तर पुस्तिका सम्परीक्षण गरी विद्यार्थीको नम्बर चढाउने र रुजू गर्ने काम भइरहेको परीक्षा नियन्त्रक अम्बिकाप्रसाद रेग्मीले जानकारी गराए ।

नतिजा प्रकाशनका लागि अन्तिम तयारीमा जुटेको बताउँदै उनले भने कुनै प्राविधिक गडबढी भएन भने पाँच दिनभित्र नतिजा सार्वजनिक गछौँ । यसवर्षको परीक्षामा चार लाख ८५ हजार ५८६ परीक्षार्थी सहभागी भएका थिए ।