म्याग्दी, असार ७ । दुर्गम तथा विकट क्षेत्रका गर्भवती, सुत्केरी र नवजात शिशुको उपचार सेवामा पहुँच वृद्धि गरेर मातृशिशु मृत्युदर कम गर्नका लागि ‘एयर एम्बुलेन्स’ सञ्चालन गर्न लागिएको महिला, बालबालिका तथा ज्येष्ठ नागरिक मन्त्री थममाया थापाले बताएकी छिन् ।
म्याग्दीको मालीका गाउँपालिका– ६ दरबाङमा आज समाजकल्याण परिषद्अन्तर्गतको राष्ट्रिय स्वास्थ्य कोषद्वारा आयोजित निःशुल्क स्वास्थ्य शिविर कार्यक्रमको उद्घाटन गर्दै मन्त्री थापाले अप्ठ्यारोमा परेका दुर्गम, विकट क्षेत्रका गरीब, विपन्न सुत्केरी, गर्भवती र नवजात शिशुलाई हेलिकप्टरबाट उद्धार गरेर तत्कालै अस्पताल पुर्याउन एयर एम्बुलेन्स सञ्चालनको तयारी गरेको जनाइन् ।
राष्ट्रपति महिला उत्थान कार्यक्रम अन्तर्गत एयर एम्बुलेन्स सञ्चालन गर्न आगामी आर्थिक वर्षका लागि मन्त्रालयले रु २९ करोड ५७ लाख बजेट विनियोजन गरिएको मन्त्री थापाले जानकारी दिएकी छिन् ।
एकदिने शिविरमा बालरोग विशेषज्ञ नवराज सुवेदी, स्त्रीरोग विशेषज्ञ सरिता गुरुङ, चिकित्सक रुपक श्रेष्ठ, दरबाङ प्राथमिक स्वास्थ्य केन्द्रका प्रमुख मेडिकल अधिकृत कृष्ण कँडेल र तीलक गौतमले सेवा प्रदान गर्ने बताइएको छ ।
शुक्रबार अन्नपूर्ण गाउँपालिकाको पोखरेबगर र शनिबार बेनी अस्पतालमा पहिचान हुने शल्यक्रिया गर्नुपर्ने बिरामीलाई थप उपचारको व्यवस्था मिलाइने कोषका अध्यक्ष हुमबहादुर बरुवालले बताए ।
मालिका, मंगला र धौलागिरि गाउँपालिकाका सर्वसाधारणलाई लक्षित गरेर शिविर सञ्चालन गरिएको हो ।
