काठमाडौं, असार ८ । काठमाडौं उपत्यकाको व्यस्त सडकको ट्राफिक व्यवस्थापनका लागि ललितपुरका मेयर चिरीबावु महर्जनले अग्रसरता देखाएका छन् ।
यसै अनुरुप काठमाडौं उपत्यकाको ट्राफिक व्यवस्थापनको विषयमा ललितपुर महानगरपालिका र काठमाडौं महानगरपालिकाका मेयर, उपमेयर तथा विज्ञहरुले अन्तरक्रिया गरेका छन् ।
असार ७ गते बिहीवार ललितपुर महानगरपलिकामा सम्पन्न अन्तरक्रियामा ललितपुर महानगरपालिकाका मेयर चिरीबावु महर्जन, काठमाडौं महानगरपालिकाककी उपमेयर हरिप्रभा खड्गी श्रेष्ठ र ललितपुर महानगरपलिकाकी उपमेयर गीता सत्याल, सडक विभागका प्रतिनिधि, ट्राफिक प्रहरी कार्यालयका प्रतिनिधि, जाइकाका प्रतिनिधि लगायत तथा विज्ञहरुसमेतको सहभागिता रहेको थियो ।
अन्तरक्रियामा ट्रान्सपोर्ट तथा ट्राफिक विज्ञ पार्थ पराजुलीले ट्राफिक व्यवस्थापन, सडकहरुको सुधार तथा जनप्रतिनिधिहरुको भूमिका लगायतका विषयहरु समेटेर प्रस्तुतीकरण गरेका थिए । आगामी आर्थिक वर्षको बजेट निर्माणको चरणमा रहेको बेलामा ललितपुर महानगरपालिकाले ट्राफिक व्यवस्थापनको विषयलाई उच्च प्राथामिकता दिएर बजेटमा समेट्न लागेको ललितपुर महानगरपालिकाका मेयर चिरीबावु महर्जनले वताएका छन् ।
मेयर चिरीवावु महर्जनले ललितपुर महानगरपालिकाको ट्रापिक व्यवस्थापनका लागि सिङ्गो काठमाडौं उपत्यकाको ट्राफिक व्यवस्थापनको गुरु योजना बनाउनु आवश्यकता औंल्याएका छन् । मेयर महर्जनले भने यसका लागि विज्ञहरुको सहयोग र समन्वयमा महानगरपालिकाले काम गर्न चाहन्छौं । हामी तपाईहरु (विज्ञ, सम्बन्धित सरोकारवाला)संग समन्वय र सहकार्य गरेरै अगाडि बढ्छौं ।’
मेयर महर्जनले साझा बससंग सहकार्य गरेर इलोक्ट्रोनिक बसहरु ल्याउन लागेको जनाउँदै उनले भने– हाम्रो नगरपलिकालाई प्रदुषणबाट मुक्त बनाउनका लागि पनि हामीले पहल गर्नु पर्छ । पेट्रोलबाट चल्ने सवारी साधनहरुलाई विस्तारै न्युनिकरण गर्न इलोक्ट्रोनिक बसहरु चलाउनु आवश्यक रहेको उनको भनाइ छ ।
त्यसका लागि हामीले साझा यातायातसँग सहकार्य गरेर ३ महिनाभित्रै इलोक्ट्रोनिक बसहरु सञ्चालनमा ल्याउछौं, त्यसका लाथि ३ करोड रुपैयां छुट्याईसकेका छौं उनले भने ।
अहिले पनि काठमाडौं उपत्यकामा वातावरण प्रदुशणको कारण दैनिक ९ जनाको मृत्यु हुने गरेको र ६३ प्रतिशत प्रदुशण सवारी साधनकै कारण हुने गरेको पनि अन्तरक्रियामा सहभागी विज्ञहरुको भनाइ छ ।
