सुर्खेत, असार ८ । गरिबी हटाउन र आर्थिक समृद्धिका लागि प्राविधिक शिक्षा आवश्यक पर्ने कर्णाली प्रदेशका मुख्यमन्त्री महेन्द्रबहादुर शाहीले बताएका छन् ।
एसओएस बालग्रामद्वारा आयोजित अन्तर्राष्ट्रिय एसओएस दिवस समारोहमा बोल्दै उनले मुलुकको गरिबी हटाउन र आर्थिक समृद्धि प्राप्त गर्न प्राविधिक शिक्षाको विकास हुनुपर्नेमा जोड दिए ।
मुलुकको गरिबी हटाउन र आर्थिक समृद्धि ल्याउनका लागि प्राविधिक शिक्षा आवश्यकता परेको भन्दै मुख्यमन्त्री शाहीले उत्पादन र श्रमसँग जोडिने शिक्षा प्रणालीको विकास गर्नुपर्ने बताएका छन् । वर्तमान शिक्षा प्रणालीमा आमूल परिवर्तनको आवश्यकता रहेको उनको भनाइ छ ।
वर्तमान शिक्षा प्रणालीको परिवर्तनसँगै शिक्षालाई श्रमसँग जोडेर लैजानुपर्नेमा मुख्यमन्त्री शाहीको जोड छ । शिक्षा आर्जन गरिसकेपछि श्रमबाट भाग्ने प्रवृत्तिको अन्त्यका लागि प्राविधिक शिक्षाको जरुरी रहेको उनको भनाइ छ ।
सामाजिक, आर्थिक र सांस्कृतिक कारणले शिक्षा क्षेत्रबाट वञ्चित बालबालिकालाई शिक्षित गराउन एसओएस बालग्राम विद्यालयले महत्वपूर्ण भूमिका निभाएको भन्दै मुख्यमन्त्री शाहीले प्रशंसा गरे ।
शैक्षिक क्षेत्रको विकासका लागि गैरसरकारी क्षेत्रकोसमेत महत्वपूर्ण योगदान रहेको जनाउँदै राम्रो काम गर्ने गैरसरकारी संस्थासँग सहकार्य गर्नका लागि प्रदेश सरकार तयार रहेको मुख्यमन्त्री शाहीले जनाएका छन् ।
