चितवन, असार ११ । नेपालमा समाजवाद स्थापना गर्नका लागि वामपन्थी र प्रजातन्त्रवादी शक्ति एकजुट भएर अगाडि बढ्नुपर्ने नेपाल कम्युनिष्ट पार्टी (नेकपा) का वरिष्ठ नेता माधवकुमार नेपालले बताएका छन् ।
नेपाल कम्युनिष्ट पार्टीका संस्थापक महासचिव पुष्पलाल श्रेष्ठको अर्धकदको शालिकको अनावरण गर्दै आज उनले निरंकुशतावादी शक्तिको हारका लागि वामपन्थी र प्रजातन्त्रवादी शक्ति एक भएर लडेको सम्झना गरे ।
अहिले नेपाल कम्युनिष्ट पार्टी पुष्पलालले देखाएको बाटोलाई नै अनुसरण गर्दै अगाडि बढिरहेको भन्दै यसबाट नेपाललाई समाजवादसम्म सजिलै पुर्याउन सकिने प्रस्ट पारे । नेपाल अब समृद्धितर्फ लाग्ने भन्दै उनले गतिशील भएर अगाडि बढ्नुपर्नेका जोड दिए ।
नदी गतिशील हुन्छ, अनि विद्युत् निस्किन्छ, तर पोखरीको पानी स्थिर हुन्छ, यसबाट कुनै शक्ति निस्किँदैन नेता नेपालले भने हामी गतिशील हुनुपर्छ, जहाँ शक्ति प्राप्त हुन्छ ।
कार्यक्रममा नेकपाका नेता सुरेन्द्र पाण्डेले देशमा उत्पादन बढाएर समाजवादतर्फ जानुपर्ने भन्दै हिजोका कतिपय मान्यता अहिले बाधक बनेको बताए ।
उक्त अवसरमा सांसद कृष्णभक्त पोखरेल र भरतपुर महानगरपालिकाका प्रमुख रेनु दाहालले पुष्पलालले देखाएकै बाटोका कारण आज देशमा उपलब्धि हासिल भएको भन्दै यसलाई संस्थागत गरी समृद्धि र विकासको बाटोतर्फ अगाडि बढ्नुपर्ने बताए ।
उक्त शालिक नारायणगढस्थित पुष्पलाल स्मृति प्रतिष्ठानको भवन अगाडि स्थापना गरिएको छ ।
