काठमाडौं, असार १४ । नेपाली सिने जगतका स्टार भन्दा फरक नपर्ने नाम हो आर्यन सिग्देल । उनलाई अभिनेता मात्र हुन् भन्दा अन्याय हुन्छ, किनकी उनी एक निर्माता पनि हुन् । फिल्म ’किस्मत’ बाट कलिउडमा उदाएका उनले ’नोभेम्बर रेन’, ’रुद्रप्रिया’, ’क्लासिक’ फिल्म निर्माण गरिसकेका छन् ।
आफ्नो ब्यानरसँग सहकार्य गर्न तयार भए मात्र बाहिरी ब्यानरका फिल्म गर्ने उद्घोष गरेका आर्यनको आफ्नै होम प्रोडक्शनमा निर्माण भएको नयाँ फिल्म ’कायरा’ आउँदो साउन १८ गतेबाट प्रदर्शनमा आउने भएको छ । हालैमा यस फिल्मको ट्रेलर सार्वजनिक भएको छ । ट्रेलर भने दर्शकले खुबै मन पराएका छन् ।
यसमा उनको अपोजिटमा अहिलेकी ‘मस्ट डिमान्डेड’ अभिनेत्री साम्राज्ञी राज्यलक्ष्मी शाह छिन् । आफ्नो खस्किँदै गएको स्टारडम जोगाउन आर्यनले साम्राज्ञीलाई जोडीको रुपमा चयन गरेको चर्चा पनि निकै छ र यस विषयमा उनी अली आलोचित पनि भएका छन् । लक्ष्मण रिजालद्वारा निर्देशित फिल्म हो ।
