दाङ, असार १८ । पश्चिम दाङको बबई गाउँपालिका–५ मा पर्ने टवाङ्खोलामा आएको बाढीले आज ना १ ख १८६१ नं को यात्रुबाहक बस बगाएको छ । स्थानीयवासी तथा प्रहरीको उद्धारका कारण बस बगाएपनि मानवीय क्षति नभएको इलाका प्रहरी कार्यालय खिलतपुरका प्रमुख प्रहरी निरीक्षक डाक्टरप्रसाद चौधरीले बताए । सो बस बगालेबाट तुलसीपुरतर्फ जाँदै गरेको जानकारी गराइएको छ ।
दुई दिनदेखि परेको अविरल वर्षाका कारण दाङको जनजीवन प्रभावित र सकस बन्न पुगेको छ । वर्षाका कारण तुलसीपुर, घोराही र लमही सडकखण्डमा पर्ने एक दर्जन खहरे खोलामा बाढी आउँदा यातायातका साधन सञ्चालन आउन सकेका छैनन् । आज बिहान ठूला गाडी छिटफुटरुपमा सञ्चालन भए पनि दिउँसो भने खोलामा पानीको बहाव ह्वातै बढेपछि बन्द रहेको जिल्ला प्रहरी कार्यालय दाङले जानकारी गराएको छ ।
दाङको राप्ती र बबई नदीमा पानीको बहाव बढेपछि त्यस आसपासका सर्वसाधारणलाई सचेत रहन आग्रह समेत गरिएको छ । जल तथा मौसम विज्ञान विभागले बबई र राप्तीमा पानीको बहाव बढेको हुँदा बाढी र पहिरोको जोखिम बढेको भन्दै म्यासेज समेत पठाइ सकेको जानकारी गराइएको छ । दाङमा आइतबारदेखि आएको अविरल वर्षाका कारण अहिले पनि जनजीवन प्रभावित र सकस बन्न पुगेको छ । विद्युत् र इन्टरनेट सेवा पनि नियमित हुन नसक्दा सर्बसाधारण थप समस्यामा परेका छन् ।
