विपद् व्यवस्थापन कोषमा सहयोग गर्न राष्ट्रिय जनमोर्चाको अनुरोध

काठमाडौँ, असार १९ । आफ्नो पार्टीले बाढी र पहिराबाट पीडित जनतालाई राहत वितरणका लागि रकम संकलन गर्न विपद् व्यवस्थापन कोषको निर्माण गरेको राष्ट्रिय जनमोर्चाले बताएको छ ।

पार्टी अध्यक्ष चित्रबहादुर केसीले सो कोषमा सहायताका लागि अनुरोध गर्दै क्षतिग्रस्त स्थानमा तुरुन्त उद्धार तथा राहतको व्यवस्था गर्न सरकार, प्रशासन र सबै तहका स्थानीय निकायसित विज्ञप्तिमार्फत माग गरेका छन् ।

वर्षाबाट पहाड र तराईमा हुने विपत्तिका लागि पूर्वसतर्कता अपनाउन र भौतिकव्यवस्था गर्न अनुरोध गरिएको छ ।

भूकम्प, बाढी, पहिरो वा आगलागीपीडितलाई गर्न देशभित्र र भारत तथा तेस्रो मुलुकमा रहेका नेपालीबाट करीब रु ८१ लाख बराबरको सहयोग प्राप्त भएको जनमोर्चाले जानकारी गराएको छ ।