काठमाडौँ, असार २० । काँग्रेस कमजोर बन्दा संसदीय व्यवस्था कमजोर हुने नेपाली काँग्रेसका नेता कृष्णप्रसाद सिटौलाले बताएका छन् । नेपाल विद्यार्थी संघ प्रदेश नं ३ ले स्वर्गीय गिरिजाप्रसाद कोइरालाको ९५औँ जन्मजयन्तीका अवसरमा आयोजना गरेको ‘गणतन्त्र स्थापना, गिरिजाप्रसाद कोइरालाको नेतृत्व र युवा विद्यार्थीको भूमिका’ बिषयक कार्यक्रममा बोल्दै सिटौलाले भने, संसदीय व्यवस्थालाई सबल, सुदृढ र प्रभावकारी बनाउनका लागि संसद्मा काँग्रेस बलियो प्रतिपक्षका रुपमा उभिनुर्पछ ।
काँग्रेस कमजोर बन्दा संसदीय व्यवस्था नै कमजोर हुने प्रष्ट पार्दै सिटौलाले भने संसदीय व्यवस्थालाई बलियो बनाउन काँग्रेस सशक्त हुनुपर्छ । संसदीय समितिको लोभमा काँग्रेस लत्रिन नहुने प्रष्ट पार्दै उनले भने संसदीय व्यवस्था बलियो बनाउने जिम्मा काँग्रेसको हो । सिटौलाले सभामुख र उपसभामुख फरक दलको हुनुपर्ने व्यवस्था संविधानले नै गरेको भन्दै सो विषयमा समेत काँग्रेसले सशक्त भूमिका निर्वाह गर्नुपर्नेमा जोड दिए । गिरिजाबाबुले शेरबहादुर देउवालाई पार्टीको २ नं. को वरियतामा राखेका कारण अहिले उनी सभापति बनेको पनि उनले जानकारी गराए ।
सोहि कार्यक्रममा बोल्दै नेपाली काँग्रेस अर्का प्रभाबशालि नेता गगनकुमार थापाले गिरिजाबाबु राजनीतिज्ञ मात्र नभएर नेपाली राजनीति क्षेत्रका होलसेलर नै भएको प्रष्ट पार्दै राजा चाहने र गणतन्त्र चाहने सबैलाई एउटै खुत्रुक्केमा अटाएर राजालाई ठेगान लाउँदै गिरिजाबाबुले मुलुकमा गणतन्त्र ल्याएको स्मरण गराए ।
त्यस्तै काँग्रेस नेता प्रदीप पौडेलले कतिपय काँग्रेसी नेतालाई अझै पनि सत्तामा नै छु भन्ने भान भइरहेको स्पस्ट पार्दै प्रतिपक्षी भूमिकामा काँग्रेस कमजोर बन्दा सत्ताको मोह नहटेको महसुश भइरहेको बताए ।
नेपाली कांग्रेसका नेता एबम् सांसद भीमसेनदास प्रधान, महिला संघकी महामन्त्री एबम् राष्ट्रिय सभाको सदस्य धना खतिवडा, नेविसंघका महामन्त्री कुन्दनराज काफ्ले लगायतले काँग्रेसलाई बलियो बनाउन जनताको मन जित्ने नेतृत्वको खोजी हुनुपर्नेमा जोड दिए ।
नेविसंघ प्रदेश ३ का संयोजक रामप्रसाद अधिकारीले बलियो काँग्रेस निर्माणका लागि नेविसंघ प्रदेशले विभिन्न समयमा रचनात्मक कार्यक्रम गर्दै आएको जानकारी गराए ।
