काठमाडौं, असार २० । नेपाली कांग्रेसको भ्रातृ संगठन नेपाल विद्यार्थी संघ (नेविसंघ) ले प्रधानमन्त्री केपी शर्मा ओलीको कार्यलय सिंहदरबार नजिकै माइतिघर मण्डलामा सरकारले लगाएको निषेधित क्षेत्र तोड्दै प्रदर्शन गरेको छ ।
बुधबार दिउँसो २ बजे नेविसंघले माइतीघर मण्डलामा निषेधित क्षेत्र तोडेको हो । नेपाली कांग्रेसका केन्द्रीय सदस्य एवं नेविसंघका पूर्व अध्यक्ष प्रदिप पौडेलको नेतृत्वमा विद्यार्थीहरु समूहले निषेधित क्षेत्र तोड्ने क्रममा तनाव सिर्जना भएको छ ।
व्यापक प्रहरी परिचालनका बाबजुद पनि नेविसंघले निषेधित क्षेत्र तोड्न सफल भयो । नेपाली कांग्रेसले आज मात्र संसदीय दलको बैठक डाकी सरकारका गलत कामको विरोध गर्ने जनाउँदै माइतीघर मण्डलामा लगाएको बन्देजलाई तोड्ने संकेत गरे लगत्तै नेविसंघले सरकारद्वारा निषेधित क्षेत्रमा विरोध प्रदर्शन गरेको हो ।
संसदमासमेत निषेधित क्षेत्र तोड्ने बारे नेपाली कांग्रेसले आन्दोलन गर्ने र विरोधमा कडा रुपले प्रस्तुत हुने बताएको थियो । सोहि अनुरुप नेविसंघले आज व्यापक प्रदर्शन गरेको हो ।
कार्यक्रमलाई प्रदिप पौडेल, नेविसंघका महामन्त्री कुन्दनराज काफ्लेले सम्बोधन गरेका थिए । सरकारले आन्दोलन र नारा लगाउन पनि निश्चित क्षेत्र तोकेपछि नेविसंघ आन्दोलित भएको हो ।
