काठमाडौँ, असार २२ । ज्येष्ठ नागरिकलाई घरघर र अस्पतालमानै पुगेर काठमाडौँ महानगरपालिकाले ज्येष्ठ नागरिक महानगर विशेष भत्ता वितरण गरेको छ ।
अस्पतालमा उपचार गराई रहेका वडा नम्बर ७ का ८६ वर्षीया सीता डंगोल र ८५ वर्षीय मीनप्रसाद उपाध्यायलाई महानगरको टोलीले बिहीबार अस्पतालमै पुगेर ज्येष्ठ नागरिक विशेष भत्ता वितरण गरेको थियो ।
वडा नम्बर ७ कै सिफल पनेकु मार्गमा आफ्नो घरमा बस्दै आएका ८६ वर्षीय जुजुभाइ महर्जन र ७६ वर्षीया नानीमाया महर्जनलाई पनि घरमा नै पुगेर विशेष भत्ता दिइएको थियो । लामो समयको अन्तरालमा गत वर्ष स्थानीय तहमा जनप्रतिनिधि आएपछि कामपाले यस वर्षदेखि ज्येष्ठ नागरिकलाई महानगर विशेष भत्ता वितरण गर्न थालेको हो ।
कामपाका ३२ वडामध्ये अहिले वडा नम्बर ७ र २६ वडाका ज्येष्ठ नागरिकलाई यस किसिमको सुविधा प्रदान गरिसकेको छ । वडा नं २६ मा ७५ वर्ष उमेर पूरा भएका महिलाको संख्या ११२ र ८० वर्ष उमेर पूरा भएका पुरुषको संख्या ४२ रहेको छ । त्यस्तै, ४११ जना एकल महिला, ८५३ जना ज्येष्ठ नागरिक, १५ जना पूर्ण अपांगता भएका र २३ जना आंशिक अपांग छन् ।
त्यसैगरी, वडा नं ७ मा सामाजिक सुरक्षा भत्ता लिने ज्येष्ठ नागरिकको संख्या ११४०, एकल महिला ५०४, पूर्ण अपांग २४ र आंशिक अपांग १३ जना छन् । भत्तासँगै उनीहरुको स्वास्थ्य अवस्था बुझ्नका लागि स्वास्थ्यकर्मी पनि परिचालन गरिएको छ, जसमा एकजना डाक्टरसहित चारजना रहेका छन् ।
बिहान १० बजेदेखि दिउँसो ५ बजेसम्म निःशुल्क सेवा प्रदान गरिने छ भने ल्याबको सुविधा, निःशुल्क औषधिलगायतको सेवा हुनेछन् । ७५ वर्ष उमेर पूरा भएका महिला, ८० वर्ष उमेर पूरा भएका पुरुषका लागि जनही वार्षिक रु १२ हजार सहित फलफूल, पोषिलो खानेकुरासहित सम्मान प्रदान गरिएको छ ।
ज्येष्ठ नागरिकको सम्मान र उनीहरुले देखाएको बाटोमा हिँड्ने र महानगरलाई समृद्ध बनाउनु सबैको दायित्व रहेको कामनपाका प्रमुख विद्यासुन्दर शाक्यको भनाइ छ । प्रमुख शाक्यका अनुसार हाल महानगरमा करीब छ हजार ९२२ जना उक्त उमेर समूहका नागरिक रहेको प्रारम्भिक अनुमान गरिएको छ ।
सामान्यतया कामपाले यसका लागि वडाका नागरिकलाई वडा कार्यालय तोके पनि तोकिएको स्थानमा आउन नसक्ने नागरिकलाई जहाँ जहाँ ज्येष्ठ नागरिक सोही स्थानमा गएर कामपाका प्रतिनिधिले सो सुविधा उपलब्ध गराइरहेका छन् ।
त्यसैगरी, कामपाको जनस्वाथ्य महाशाखा प्रमुख हरिकुमार श्रेष्ठका अनुसार महानगरले दिएको वार्षिक रु १२ हजार ज्येष्ठ नागरिकको दैनिक जीवनयापनमा खासै अर्थ नराखे पनि स्थानीय सरकार छ भन्ने महशुस चाहीँ हुन सक्ला ।
