ट्र्याक्टर दुर्घटना हुँदा एकको मृत्यु पाँच घाइते

इलाम, असार २५ । गएराति इलामको माङसेबुङमा ट्याक्टर दुर्घटना हुँदा एक जनाको मृत्यु भएको छ ।

माङसेबुङबाट झापाको दमकतर्फ जाँदै गरेको ट्र्याक्टर माङसेबुङ गाउँपालिका–३ स्थित मानपुरमा दुर्घटना हुँदा अन्य पाँचजना घाइते भएका छन् ।

घाइते भएका माङसेबङ गाउँपालिका–६ रक्सेका अन्दाजी २१ वर्षीय सरेन राईलाई उपचारका लागि अस्पताल लैजाने क्रममा बाटोमै मृत्यु भएको जिल्ला प्रहरी कार्यालयले बताएको छ ।

घाइते पाँचजनाको झापाको विभिन्न अस्पतालमा उपचार भइरहेको छ भने ट्र्याक्टर चालक विक्रम लावती फरार रहेको जनाइएको छ ।