इनरुवा, असार ३२ । काँग्रेसले लोकतान्त्रिक पद्धतिलाई सम्मान गर्दै प्रतिपक्षमा रहेर पनि सरकारलाई रचनात्मक सहयोग गर्न तयार रहेको नेपाली काँग्रेस संसदीय दलका उपनेता विजयकुमार गच्छदारले बताएका छन् ।
आइतबार सुनसरीको बर्जु गाउँपालिकाको बजेट नीति तथा कार्यक्रम सार्वजनिक गर्न आयोजित कार्यक्रममा बोल्दै उनले काँग्रेस नेतृत्वको सरकारले तीनै तहको चुनाव सकेर लोकतान्त्रिक अभ्यासको प्रत्याभूति दिलाएको बताए ।
उनले अहिलेको सरकार अधिनायकवादतर्फ उन्मुख रहेको जनाउँदै संवैधानिक निकाय, प्रेस स्वतन्त्रता र न्यायपालिकामा समेत हस्तक्षेप गरेको आरोप लगाएका छन् ।
फरक प्रसंग निकाल्दै उनले मुलुकमा धेरै पार्टी नरहने दाबी गर्दैै नेकपा र नेपाली काँग्रेस मात्र रहने जिकिर गरे । गच्छदारले सुनसरीको विकास निर्माणमा आफ्नो सबैभन्दा ठूलो योगदान रहेको बताए ।
कार्यक्रममा बर्जू गाउँपालिकाले आर्थिक वर्ष २०७५/०७६ का लागि रु ३६ करोड, ६६ लाख, १४ हजार बराबरको बजेट सार्वजनिक गरेको थियो ।
गाउँपालिकाका अध्यक्ष राघुनन्दन चौधरीले कृषि, वन, पर्यटन, शिक्षा, स्वास्थ्य, वातावरणलगायतका शीर्षकमा विनियोजित बजेट सार्वजनिक गरे ।
