सम्माननीय प्रधानमन्त्री श्री के.पी. शर्मा ओली ज्यू
तथा सत्याग्रही डा. गोविन्द के.सी.ज्यूमा सादर
अनुरोध ।
विषयः स्वास्थ्य र शिक्षालयलाई राष्ट्रियकरण गराई पाउँ ।
महोदयहरु
तपाईंहरु दुबै जना आ– आफ्ना क्षेत्रमा अब्बलकहलाई जनसेवामा समर्पित हुनुहुन्छ । तपाईंहरु दुबैका मुद्घा एक आपसमा जनहितकारी नै छन् भन्ने तिन करोड जनताले ठहर गरेकै कारण तपार्इंहरुको तर्फ जनसमर्थन उर्लिएको हो । आज त्यो दुबै जनसागरको भेललाई विभाजित नभईकन नेपाल देशको भुमिमा सिंचाई गर्न सक्दा देश र जनता चाँडै नै समुन्नत हुने थिए । तर विडम्वना नै भन्नु पर्दछ । आजसम्मको गतिविधीलाई मुल्याङ्कन गर्दा एउटा समुहगत अभिष्ट बोकेर हिंड्ने तत्वले नै तपाईंहरुलाई एकाकार हुन दिईरहेको छैन भन्ने ठहर जनताहरुले गरिसकेका छन् । अब त्यस किसिमको तत्वलाई समयमै पर्गेल्ने जिम्मासमेत जनताले तपाईंहरुलाई नै सुम्पिएका छन् । तपाईंहरुका बिषयगत रुझानमा जनता सिधै सामेल हुन चाहन्छन् । तर विडम्वना किन विचौलिया मात्रै हावी भैरहेको छ ? जनताको प्रश्न यति मात्रै हो । अब त्यसो हुन नपाओस् । सम्माननिय महोदयहरु नेपालको संविधानको मौलिक हक र कर्तव्य अन्तर्गत धारा ३५ को उपधारा १ मा प्रत्येक नागरिकलाई राज्यबाट आधारभुत स्वास्थ्य सेवा निशुल्क प्राप्त गर्ने हक हुनेछ र कसैलाई पनि आकस्मिक स्वास्थ सेवाबाट वञ्चित गरिने छैन । साथै यसै धाराको उपधारा ३ ले प्रत्येक नागरिकलाई स्वास्थ सेवामा समान पहुँचको हक हुनेछ । भन्ने आसयले नागरिकको मौलिक अधिकारको स्थापना गरेकै आधारमा सत्याग्रही डा. गोविन्द के.सी. र राज्य दुबै सहमत हुन सक्ने स्थान र एक सूत्रिय ब्यवस्था भनेको स्वास्थ्य लगायत शिक्षालय समेतलाई राष्ट्रियकरण गर्नमा नै सहमत भए पछि मात्र सदाका लागि टुङ्गो लाग्न सक्दछ । अन्यथा यो रोग दिर्घकालिन बन्न बेर लाग्दैन ।
१, जनताको उचित मागमा राज्य वा सरकार संवेदनशील बन्नै पर्दछ ।
२, सत्याग्रहीसमेत कुनै पनि दल वा पार्टीको अभिष्ट पुरा गर्ने साधन बन्नबाट समयमै सचेत बन्न सक्नु पर्दछ । कुनै पनि दल वा संगठनको उपयोग गर्ने नितीमाथि निगरानी राख्न सकिएन भने सदा सर्वदा उपयोगको साधन मात्र बनी रहनाले जनताको उच्च आकांक्षा सेलाएर जान सक्दछ । उपयोग गर्न चाहनेहरुको उच्च नेतृत्वलाई एक पटक आफुसँगै भोक हड्तालमा उत्रन आव्हान गर्नुहोस् त के उत्तर आउँछ ? आमरण त होईन रिले अनशन भन्ने जवाफ बाहेक केही आउने कल्पना समेत नगर्नुहोस् । आमा बाबुको मृत्यु र श्राद्धमा एकछाकी गर्न समेत उनीहरु तत्पर नहुन सक्दछन् । यती मात्र होईन तपाईंको सत्याग्रहको आधाजसो अवधीमा त आज तपाईंलाई सघाउन भन्दै राजनैतिक ब्यापारमा चाटुकारीता देखाउनेहरु नै थिए । किन त्यतीबेला उनिहरु तपाईंका माग पुरा गर्न तत्पर भएनन् ? अब प्रश्न गर्न समेत तत्पर हुनुहोस् । डा. के.सी. तपाईंका सत्याग्रह जनहितकारी होईनन् भन्न नसकिएला तर यदी सत्याग्रहबाट यस किसीमको उपलब्धीहरु प्राप्त भएछन् भने पनि यस्ता उपलब्धिहरु जनहितका लागि स्थापित हुन नसक्नुमा तिनै छद्म भेषी राजनैतिक दलहरु नै कारक बन्न सक्नेमा शंका गरिरहनु नपर्ला । किन की उनिहरु नै स्वास्थ र शिक्षाका महाब्यापारीहरु हुन् । त्यसै कारण पनि तपाईंका माग एक शुत्रिय होस् र यसलाई राज्य सत्ताले समयमै अनुमोदन गरोस् भन्ने कुरामा आसाभरोसा तिनकरोड जनताले राखेकाछन् ।
३, डा. के.सी. तपाईंका अधिकाँस माग जनहितकारी नै होलान् तर त्यती हँुदा हुँदै पनि यो सवाललाई सदाका लागी समायोजन गर्ने नै हो भने तपाईं लगायत राज्यसत्ता समेत स्वास्थ्य र शिक्षा सम्वन्धी सम्पुर्ण निकाय राष्ट्रियकरण हुनु पर्नेमा सहमत हुनु पर्दछ । यसकालागी समुचित पहल कदमी सम्माननिय प्र.म. के.पी. शर्मा ओलीको अगुवाईमा होस् भन्ने जनता चाहन्छन् । अनि मात्र संविधानले परिकल्पना गरे अनुरुप प्रत्येक नागरिकलाई स्वास्थ सेवामा समान पहुँचको हक स्थापीत हुनेछ । अन्यथा मिथ्या परिकल्पनाको दस्तावेज नबनोस् नेपालको जनप्रतिनिधीद्वारा निर्मीत हालको संविधान ।
४, स्वास्थ्य र शिक्षा जस्तो उन्नत समाजका लागी अपरिहार्य मौलिक हक कुण्ठित नहुनका लागी भौगोलिक र सामाजिक संरचना अनुरुपको यी दुई बिषयमा अनिवार्य समानुपतिक वितरण हुनै पर्दछ ।
५, राणाकाल सम्म स्वास्थ र शिक्षामा पहुँच अभिजात वर्गमा बाहेक अन्यका लागी छदै थिएन भन्दा हुन्छ । पञ्चायतसम्म आई पुग्दा दुई स्टेपमा बिभाजित भयो । हाल आएर तिन स्टेपमा बिभाजित भएको छ । उच्च र सम्पन्नका लागी अत्याधिक सुविधा सम्पन्न स्वास्थ र शिक्षालय भएकाछन् । निम्नवर्गका लागी सरकारी स्वास्थ र शिक्षालय समेत प्राप्त भैसकेका छैनन् । सत्ता र ब्यावस्थानै परिवर्तन गर्न सार्मथ्य राख्ने मध्यमवर्गका लागी स्वास्थ्य र शिक्षा दुबै घरको न घाटको अवस्थामा छन् ।
६, सम्माननिय प्र.म. के.पी. ओली ज्युलाई समेत हामी तिनकरोड जनताको तर्फबाट एउटा अनुरोध छ कि जनताबाट पारित भैसकेको समाजवाद उन्मुख जनसंविधानको मर्म अनुसार पनि तपाईंका हरेक राजनैतिक निर्णयहरु समाजवादी चरित्रका हुनु पर्दछ । त्यसैले हाम्रो सामुहिक आग्रह भनेको स्वास्थ र शिक्षालयलाई तत्काल राष्ट्रियकरण गरी स्वास्थ र शिक्षामा हुनु पर्ने जनताको समान हक कायम गर्न ढिला नगर्नुहोस् ।
७, गहुँ पिस्दा केही घुनहरु समेत पिसिन सक्दछन् । आँट गर्नुहोस् तपाईंका दलमा समेत यस्ता तत्वहरु हुन सक्दछन् । यस्तो महाअभियानमा त्यस्ता केही पिसीदैमा कुनै पर्वाह नगर्नुहोस् । यस्ता कार्यले देश र जनता सदाका लागी सुखी हुनेछन् । संविधान प्रदत्त हक अधिकार दिलाउनका लागी सरकार निर्मम हुनै पर्दछ ।
८, डा. के.सी. र प्र.म. ओली दुबैमा हामी तिनकरोड जनताको सादर अनुरोध छ कि तपाईंहरु दुबै जनताका निश्वार्थ सेवक हुनुहुन्छ । त्यसैले स्वास्थ र शिक्षालयलाई यथाशक्य चाँडो राष्ट्रियकरण गर्नमा एैक्यवद्धता जनाउनुहोस् । जसका कारण माग र पुर्तिको नियम समान रुपमा लागु भएको जनता हेर्न र भोग्न तम्तयार छन् । यसैबाट जनताको अक्षुण मौलिक हकको सम्मान हुनेछ । अस्तु !
भवदीय
राजेन्द्र प्रसाद पाठक
rajendra2p@gmail.com
