लहान, साउन ६ । लहान कर्जन्हा नगरपालिकाका प्रमुख गंगा पासवानले आफ्नै कार्यालयमा काम गर्ने कर्मचारीलाई कुटपिट गरेको भन्दै स्थानीयवासीले कारबाहीको माग गर्दै विरोधस्वरुप आज बिहान पूर्वपश्चिम राजमार्गअन्तर्गत सिरहा बस्तीपुरमा चक्काजाम गरेका छन् ।
नगर प्रमुख पासवानलाई जबर्जस्ती काम गर्न दबाब दिँदै नगरपालिकाका कर्मचारी बलिराम यादवमाथि कुटपिट तथा दुव्र्यवहार गरेको आरोप छ । बिहान ८ बजेदेखि स्थानीयवासीले आधा घण्टा चक्काजाम गरेका हुन् । चक्काजामका कारण पूर्व र पश्चिमबाट आएका सवारीहरु बाटामै रोकिएका थिए ।
स्थानीयवासीले चक्काजाम गरेपछि इलाका प्रहरी कार्यालय मिर्चैया र कर्जन्हाबाट खटिएको प्रहरी टोलीले हस्तक्षेप गरी बाटो खोलाएको थियो ।
नगरपालिकाले खरिद गरेको माटो खन्ने जेसिबी गाडीको भ्याट बिलविना नै भुक्तानीका लागि कागजपत्र तयार पार्न भनेको र नमानेका कारण आफूमाथि नगर प्रमुखले कुटपिट गरेको नगरपालिकाका जिन्सी तथा प्रशासन शाखा प्रमुख यादवले आरोप लगाए ।
नगर प्रमुख पासवानलाई कारवाही गर्नुपर्ने मागसहित आफूहरुले चक्काजाम गरेको स्थानीयवासी तथा नयाँ शक्ति पार्टीका नेता प्रभात महतोले बताए ।
