ताप्लेजुङ, साउन ६ । ताप्लेजुङ जिल्लामा विद्युत् र इन्टरनेट सेवा ठप्प हुँदा सेवाग्राही मर्कामा परेका छन् । शुक्रबारदेखि विद्युतीय सेवा बन्द हुँदा शनिबारदेखि इन्टरनेट सेवासमेत प्रभावित बनेको हो ।
जसबाट ताप्लेजुङका बासिन्दा मर्कामा परेका हुन् । केन्द्रीय प्रसारण लाइन अन्तर्गत पाँचथर–ताप्लेजुङ खण्डमा आएको खराबीका कारण विद्युत् आपूर्तिमा समस्या देखिएको छ ।
इलाम क्षेत्रमा अप्टिकल फाइबरमा आएको खराबीका कारण शनिबारदेखि इन्टरनेट (एडिएसएल) सेवासमेत बन्द भएको छ । विद्युत् र इन्टरनेट विद्युत् र इन्टरनेट सेवा बन्द भएपछि रेडियो, पत्रपत्रिकालगायत सञ्चारमाध्यमसमेत समस्यामा परेका छन् ।
विद्युत् प्राधिकरण ताप्लेजुङ वितरण केन्द्रका अनुसार शनिबार बिहानैदेखि प्राविधिकहरु खटिए पनि समस्या पत्ता लाग्न नसकेकाले विद्युत् र इन्टरनेट सेवा सञ्चालन हुन समय लाग्ने जनाइएको छ ।
