काठमाडौं, साउन ८ । कम्युनिष्टहरुको एकता र निर्वाचनबाट बनेको दुई तिहाइको सरकारविरुद्ध नियोजित षड्यन्त्र गरी भ्रामिक प्रचार प्रसार गरिएको पार्टीका अध्यक्ष पुष्पकमल दाहाल ‘प्रचण्ड’ले बताए ।
आज नेकपा केन्द्रीय कार्यालय धूम्रबाराहीमा आयोजना गरेको कार्यक्रममा बोल्दै उनले भने– हामीले चुनाव जिते पनि क्रान्ति जितेका छैनौँ । प्रतिक्रान्ति र क्रान्तिकारीबीचको लडाइँ जारी नै छ । प्रतिक्रियावादीहरुलाई कम्युनिष्ट एकता र स्थिर सरकार मन परेको छैन तर हामी त्यस्ता षड्यन्त्रलाई सफल हुन दिने छैनौँ ।
भए/नभएका कथाहरु बनाएर सरकार र नेकपाको विरोधमा भ्रम फैलाउने काम भएकाले क्रान्तिलाई सफल बनाउन र स्थिर सरकारको विरुद्ध सबै हतियार प्रयोग गरेर भइरहेका नियोजित षड्यन्त्र चिर्न उनले अनुरोध गरे ।
प्रा डा केसीको अनशनको नाममा सरकारलाई टिक्नै नदिने वितण्डा मच्चाउन खोजिएको भन्दै उनले पार्टी र सरकारको कामलाई समृद्धिको दिशातर्फ एकजुट भएर लाग्नुको विकल्प नभएको बताएका छन् ।
