काठमाडौँ, साउन १० । शहरी योजना आयोगले काठमाडौँ महानगरपालिकास्थित चालु आर्थिक वर्षमा पुरातात्विक सम्पदाको डिजिटल अर्काइभ बनाउने भएको छ ।
पुराना कामलाई निरन्तरता दिने र नयाँ ३० वटा काम गरिनेमा यहाँको पुरातात्विक सम्पदाको डिजिटल अर्काइभ राख्ने काम नयाँ र महत्वपूर्ण काम भएको सो योजना आयोगका सदस्य–सचिव सरोज बस्नेतले बताए ।
यसरी प्रारम्भ हुने काममा टेकुमा रहेको पचली भैरवको संरक्षण, आकाशे पुल निर्माण, स्मार्ट टेक्नोलोजी कम्पिटिसन, तथ्याङ्क केन्द्र स्थापना, प्रशासनिक सुधार, सामुदायिक कार्यक्रमको मूल्याङ्कनजस्ता छन् ।
त्यसैगरी अनौपचारिक क्षेत्र सुधार, वातावरणीय अध्ययन अनुसन्धान, साझेदारी विकास, सामुदायिक स्वास्थ्य सेवा तथा फार्मेसी सेवा सञ्चालन, महानगरपालिकाको गुणस्तरीयतासम्बन्धी मापदण्ड, न्यून आय भएका परिवारका लागि भाडाघर निर्माणसम्बन्धी अध्ययन, शहरी यातायात सुधारसम्बन्धी अध्ययन, साइकल ट्र्यक निर्माण, सार्वजनिक संरचना मर्मतजस्ता कार्यक्रम रहेका छन् ।
