बस दुर्घटनामा ६ को मृत्यु, २२ घाइते

काठमाडौं, साउन ११ । काठमाडौंबाट पोखरातर्फ जाँदै गरेको ना ६ ख २५०६ नं को बस कुरिनटार नजिकै चुम्लिङटारमा हुँदा ६ जनाको मृत्यु भएको छ ।

उक्त दुर्घटनामा परि २२ जना घाइते भएका छन् । मृत्यु हुनेमा तीन पुरुष, दुई महिला र एक बच्चा रहेको जिल्ला ट्राफिक प्रहरी कार्यालय चितवनका प्रहरी निरीक्षक बेद गौतमले जानकारी गराएका छन् ।

घाइते भएका २२ जनालाई उद्धार गरि अस्पताल लगिएको जनाइएको छ । उद्धार कार्य सकिएको प्रहरीले बताएको छ । पृथ्वीराजमार्गको इच्छाकामना–३ चुम्लिङटारमा बस र ना ५ प ७४०९ को ट्रकसँग जुध्दा बस त्रिशुलीमा खसेको थियो ।

बस सडकबाट करिब ७० मिटर तल झरेर त्रिशुली नदीको किनारमा पुगेको थियो । ट्रकका चालकलाई भने पक्राउ गरिएको छ ।