काठमाडौँ, असोज ८ । असोज १३ गते शनिबारदेखि हुन लागेको शहीद स्मारक ‘ए’ डिभिजन लिगमा राष्ट्रिय टोलीका मुख्य खेलाडीले ६ क्लबबाट प्रतिस्पर्धा गर्दैछन् ।
लिग प्रारम्भ हुन करीब एक सातामात्रै बाँकी रहँदा लिगमा सहभागी १४ टोलीमध्ये ६ क्लबले राष्ट्रिय टोलीका खेलाडी अनुबन्ध गर्न सफल भएका छन् । अखिल नेपाल फुटबल संघ (एन्फा)मा ए डिभिजनका लागि १४ क्लबले दर्ता गराएको खेलाडीको सूचीमा मनाङ मस्र्याङ्दी क्लबले राष्ट्रिय टोलीका सबैभन्दा धेरै पाँच खेलाडी अनुबन्ध गरेको छ ।
मनाङले क्लबमा मिडफिल्डर सुजल श्रेष्ठ, अञ्जन विष्ट, विशाल राई, हेमन गुरुङ र डिफेन्डर एवं राष्ट्रिय टोलीको कप्तान विराज महर्जनलाई अनुबन्ध गरेको छ ।
त्यसैगरी त्रिभुवन आर्मी क्लबबाट गोलकिपर विकेश कुथु, डिफेन्डर सुमन अर्याल तथा फरवार्ड भरत खवास र नवयुग श्रेष्ठले ए डिभिजन लिग खेल्ने छन् । थ्रीस्टार क्लबबाट गोलकिपर एलन न्यौपाने, डिफेन्डर अनन्त तामाङ, मिडफिल्डर नीराजन खड्का र सुनिल बलले खेल्ने भएका छन् ।
च्यासल युथ क्लबबाट देवेन्द्र तामाङ र हेमन्त थापामगरले खेल्छन् भने एपिएफ क्लबबाट आदित्य चौधरीले खेल्ने छन् । डिफेन्डर दिनेश राजवंशी नेपाल पुलिस क्लबमा आबद्ध रहेका छन् । स्टार स्ट्राइकर विमल घर्तीमगरको भने अहिलेसम्म क्लबको टुङ्गो लागिसकेको छैन ।
विमललाई लिन थ्रीस्टार र च्यासल युथ क्लबले छलफल अगाडि सारेका छन् । यही असोज १३ गतेदेखि हुन लागेको शहीद स्मारक ‘ए’ डिभिजन लिग फुटबल प्रतियोगीताको उद्घाटन खेल न्युरोड टोली एनआरटी र विभागीय टोली त्रिभुवन आर्मी क्लबबीच हुनेछ ।
लिगमा १४ ‘ए’ डिभिजन क्लब थ्री स्टार, मनाङ मस्र्याङ्दी, नेपाल पुलिस, एपिएफ, आर्मी, जावलाखेल युथ क्लब, फ्रेन्ड्स क्लब, संकटा, मछिन्द्र क्लब, सरस्वती युथ क्लब, च्यासल युथ क्लब, न्युरोड टोली (एनआरटी) , ब्रिगेड ब्वाइज र हिमालयन शेर्पा क्लब भिड्ने छन् ।
राउण्ड रोविन लिगको आधारमा हुने उक्त प्रतियोगितामा कुल ९१ खेल हुनेछन् । लिगको विजेतालाई रु ५० लाख, उपविजेतालाई रु ३५ लाख, तेस्रोलाई रु २५ लाख, चौथोलाई रु १५ लाख, पाँचौलाई रु सात लाख र छैटौं टोलीलाई रु पाँच लाख पुरस्कार प्रदान गरिनेछ ।
फेयर प्ले टोलीले रु एक लाख तथा प्रत्येक खेल जिते बापत एन्फाले क्लबलाई रु ५० हजार र म्यान अफ दि म्याच हुने खेलाडीलाई रु १० हजार पुरस्कार दिइनेछ ।
लिग विजेता टोलीले एएफसी एसियन कप फुटबलमा सहभागिता जनाउन पाउनेछ । पछिल्लो पटक ‘ए’ डिभिजन लिग २०७१ सालमा भएको थियो ।
