बद्री पन्त
महिला उद्यमीलाई सुइटर उद्योगबाट मनग्य आम्दानी
जाजरकोट, मंसीर ११ । जाजरकोटको भेरी नगरपालिका ३, थाप्लेमा सुइटर उद्योग संचालमा आएको छ । उक्त उद्योगबाट ५ जनाले रोजगारीसमेत पाएका छन ।
आर्थिक उत्पादन र समृद्धिका लागि केही गर्नुपर्छ भन्ने विचारकी शारदा हमाल यतिबेला अशल उद्यमी बन्न सफल भएकी छिन् । उनलाई आफैले खोलेको उद्योगमा कामको भ्यानभ्याई छ । सुइटर उद्योगबाट हमाललाई मासिक ५० हजार देखि ६० हजारसम्म आम्दानी हुने गरेको छ ।
घरेलु तथा साना उद्योग विकास समितिबाट ३ महिने तालिम लिएपछि उद्योग संचालन गर्ने प्रेरणा मिलेको हमालको भनाइ छ । गत चैतदेखि भेरी नगरपालिका ३, थाप्लेमै शारदा होजीयारी उद्योग संचालनमा ल्याएपछि हमाल अशल उद्यमी बनेकी हुन् ।
उनी अशल उद्यमी मात्र नभएर वेरोजगारलाई रोजगार दिन पनि सफलसमेत भएकी छिन् । उनको सुईटर बुन्ने उक्त उद्योगमा ५ जनाले रोजगारी पाएका छन् । उनले १० लाख लगानीमा सुइटर बुन्ने उद्योग खोलेकी हुन् ।
उनको उद्योगमा सुईटर बुन्नका लागि विद्युतीय पावर मेशीन, ह्याण्ड फ्लाइट मेशीन, सिलाई मेशीन र इन्टरलग मेशीन रहेका छन् । उद्योगमा दैनिक ५० देखि ६० वटासम्म सुईटर निर्माण हुने गरेको उद्यमी हमालको भनाइ छ ।
विभिन्न कलर र साइजका लेडिज तथा जेण्डस् सुईटर बालबालिकादेखि बृद्धबृद्धासम्मका लागि बुन्ने गरेको छ । विशेष गरी विद्यालय पोशाकका लागि सुइटर उत्पादन हुने गरेको छ । सुईटर बुन्न सिकाउने र मेशीन संचालन गर्ने तालिम दिनका लागि मासिक ४५ हजार खर्च ब्यहोरेर भारतको हरिद्वारबाट प्रशिक्षक ल्याएको छ ।
विहान वेलुका घरको काम गरेर सुईटर बुन्ने कामबाट रोजगारी पाइएको स्थानीय गिता शाहले बताउँछिन् । उद्योगमा उत्पादन भएको प्रति सुइटरको ३ सय देखि ७ सय मुल्य पर्छ । उद्योगमा हालसम्म ३ हजार थान सुईटर उत्पादन भएर खपत भैसकेको छ ।
विद्यालय तथा शिक्षण संघ सस्थाबाट सुईटरको माग अत्यधिक आउने गरेको छ । एउटै विद्यालयबाट ३/४ सय थानको माग आएको छ । सुइटर बुन्ने उद्योग एउटा मात्र भएकोले पनि माग अनुसार पुर्याउन धौ–धौ हुने गरेको छ ।
जिल्लामै उद्योग स्थापना भएपछि सुइटर किन्न बाहिर जानु पर्ने अवस्थाको अन्त्य भएको छ । यहाँ उत्पादन भएको सुइटर सुर्खेत, नेपालगंज लगायत बजारबाट ल्याएको भन्दा सस्तो मुल्यको रहेको छ ।
जिल्लाभरका विद्यालयका विद्यार्थीका लागि आवश्यक पर्ने सुइटर शारदा होजीयारी उद्योगबाट पुर्ति हुने जनाइएको छ ।
