पर्वत, जेठ १२ । प्रमुख प्रतिपक्षी दल नेपाली कांग्रेसका महामन्त्री डा. शशांक कोइरालाले धर्म सापेक्ष वा निरपेक्ष नभई स्वतन्त्र हुनु पर्नेमा जोड दिएका छन् ।
विश्वकै अग्लो शिव र पार्वतीको मूर्ति निर्माण गर्ने, सिसमहल, ज्योतिर्लिङ्ग स्थापना र धर्मशाला बनाउने उद्देश्यले पर्वतमा जेठ १ गतेबाट सञ्चालित कोटीहोम तथा सामूहिक तुला दान महायज्ञको समापन कार्यक्रमलाई सम्बोधन गर्दै महामन्त्री कोइरालाले धर्म स्वतन्त्रताको कुरामा आफूहरु लागि पर्दै आएको जानकारी गराएका छन् ।
उनले राज्यको धर्म न सापेक्ष हुने न निरपेक्ष, राज्य धर्मका विषयमा स्वतन्त्र हुने समेत स्पष्ट पारेका छन् । कांग्रेसको झण्डामा रहेका चार तारामध्ये एउटा ताराको अर्थ धार्मिक स्वतन्त्रता भएको भन्दै कांग्रेसको सिद्धान्त नै धार्मिक स्वतन्त्रता भएको महामन्त्री कोइरालाले स्पष्ट पारेका थिए । महायज्ञ मूल आयोजक समितिका संयोजक पृथ्वीनारायण शर्माले हिमालय पर्वतकी छोरी तथा महादेवकी पत्नी पार्वतीको जन्म पर्वतको पाङमा नै भएको जानकारी गराएका थिए ।
कार्यक्रममा प्रतिनिधिसभाका सांसद पदम गिरी, नेपाली कांग्रेसका पूर्वमन्त्री दीपक गिरी, पण्डित ईश्वरकृष्ण भुर्तेल, कांग्रेस केन्द्रीय सदस्य तथा पूर्व सांसद अर्जुनप्रसाद जोशी, कुस्मा नगरपालिकाका प्रमुख रामचन्द्र जोशी र प्रमुख जिल्ला अधिकारी गुरुदत्त ढकाल लगायतको समेत सहभागिता रहेको थियो ।
