कामठाडौं, मंसिर १३ । मनमोहन कार्डियोथोरासिक तथा भास्कुलर सेन्टरमा उपचाररत प्रधानमन्त्री केपी शर्मा ओली नियमित रुपमा काममा फर्कन केही समय लाग्ने भएको छ । शुक्रबार पत्रकार सम्मेलनमार्फत विशेषज्ञ चिकित्सकले प्रधानमन्त्री एक हप्ता सम्म अस्पतालमै रहने बताउँदै दश दिनपछि नियमित काममा फर्कन सक्ने जानकारी गराएका छन् । प्रधानमन्त्रीको स्वास्थ्यमा उल्लेख्य सुधार आइरहेको बताउँदै विशेषज्ञ चिकित्सक डा. रमेशसिंह भण्डारीले भने, प्रधानमन्त्रीज्यू एकसाता अझै अस्पतालमा रहनुहुन्छ ।
दश दिनपछि नियमित काम गर्न, अन्तर्वार्ता दिन सक्नुहुन्छ । एपेन्डिसाइटिसको शल्यक्रियापश्चात सघन कक्षमा उपचाररत प्रधानमन्त्रीको मङ्गलबार र बुधबार दुईपटक डायलाइसिस गरिएको भण्डारीले जानकारी गराएका छन् । अहिले मनमोहन कार्डियोथोरासिकमै डायलाइसिस गरिएको छ । प्रधानमन्त्रीका निजी चिकित्सक डा. दिव्या सिंहले नियमित डायलाइसिस गराउनुभन्दा प्रत्यारोपण उत्तम विकल्प रहेको जनाउँदै प्रधानमन्त्रीको मृगौला पुनः प्रत्यारोपण गरिने बताएकी छिन् ।
प्रधानमन्त्रीको उपचारमा संलग्न विशेषज्ञ चिकित्सकहरूले प्रधानमन्त्रीको एपेन्डिसाइटिस फुटेको नभइ पाकेर फैलिएको बताएका छन् । प्रधानमन्त्रीले सामान्य हिँडडुल गर्न थालेको उनको भनाइ छ । सामान्य बिरामीको तुलनामा अङ्ग प्रत्यारोपण गरिएको बिरामीमा एपेन्डिसाइटिस पाकेर फैलने सम्भावना ज्यादा हुने जानकारी गराइएको छ । सामान्य बिरामीको पेटमा सङ्क्रमण फैलन १२ घण्टा लाग्छ । तर अङ्ग प्रत्यारोपण गरिएको बिरामीको ३–४ घण्टामै फैलन्छ । प्रधानमन्त्रीको भएको त्यही हो,” चिकित्सकले जानकारी दिए ।
डा. दिव्याले प्रधानमन्त्रीलाई मुखबाट ठोस खानेकुरा खुवाउन थालिएको जानकारी दिइन् । १२ वर्षअघि सन् २००७ मा मिर्गौला प्रत्यारोपण गरिएका प्रधानमन्त्रीको मिर्गौलाको कार्यक्षमतामा ह्रास आएको छ । पछिल्लो पटक ग्राण्डी अन्तर्राष्ट्रिय अस्पतालमा डायलाइसिस गरिँदै आएको थियो ।
