काठमाडौं, मसिर १६ । नेपाल आइडलको मन्चबाट बाहिर निस्केपछि उनले केही गीत गाएता पनि फिल्म ‘रोज’ को ‘फूल हैन’ गीतबाट नसोचेको सफलता हात पारेका गायक हुन प्रताप दास ।
उनलाई आजभोली नेपाली फिल्मको गीतमा आवाज भर्दा भर्दै फुर्सद नै छैन । यसक्रममा उनले शनिबार छायांकनको तयारीमा रहेको फिल्म ‘अन्तरे’ को टाइटल गीतमा आफ्नो स्वर दिएका छन् । गायक दासले ‘उड्छ आकाशमा’ बोलको गीत गाउने अवसर पाएकोमा निर्माण टिमप्रति आभार प्रकट गरेका छन् ।
निर्देशक सत्यराज चौलागाईं स्वयंको शब्द रहेको गीतमा सरोज पोखरेलले संगीत दिएका छन् । गीतका एरेञ्जर गोपाल रसाइली हुन् । यो गीत फिल्ममा कथाको माग रहेको निर्देशक चौलागाईंले जानकारी गराए । फिल्म नामका कारण नै चर्चामा रहेको छ । चलचित्रमा गत वर्षको फिल्म ‘बुलबुल’ मा ‘चोपेन्द्र’ को भूमिका अभिनय गरेका अभिनेता मुकुन भुषालले टाइटल क्यारेक्टर निभाउने भएका छन् । फिल्मका लागि अहिले निर्माण टिम अन्य कलाकारको खोजीमा जानकारी पाइएको छ ।
