बनभोजका लागि गएको बस भक्तपुरमा दुर्घटना

भक्तपुर, मंसिर २७ । भक्तपुरको सूर्यविनायक नगरपालिका–८ घ्याम्पेडाँडा पिकनिकको लागि गएको बस दुर्घटनामा परेको छ । काठमाडौँको मदन भण्डारी मेमोरियल कलेजबाट भक्तपुरमा बनभोज आएको बस दुर्घटना परेको हो ।

महानगरीय प्रहरी वृत जगातीका डिएसपी चक्रराज जोशीका अनुसार शुक्रबार बिहान कलेजबाट रिद्धिसिद्धी यातायातको बा ५ ख ४२८६ नम्बरको बस सडकमै पल्टेको हो । प्रहरीका अनुसार ११ वटा गाडीमा कलेजका विद्यार्थीहरु र शिक्षकहरु बनभोजका लागि सो तर्फ जाँदै गरेको अवस्थामा दुर्घटनामा परेको छ ।

दुर्घटनामा २२ जना घाइते भएको प्रहरीले जनाएको छ । घाइतेमध्ये २ जना गम्भिर घाइते भएको प्रहरीको भनाई छ । बाँकी २० जनाको अवस्था सामान्य रहेको बताइएको छ । दुर्घटनामा घाइते २० जना डाक्टर इवामुवारा अस्पताल सल्लाघारी र २ जनाको भक्तपुर अस्पतालमा उपचार भइरहेको प्रहरीले जानकारी गराएको छ ।