तेस्रो चरणको स्थानीय निर्वाचनमा सहभागी हुँदै गरेका प्रदेश नं २ का आठ जिल्लाका १३६ वटै स्थानीय तहमा बुधबार हुने उम्मेदवारी मनोनयन दर्ता कार्यक्रममा उत्साहपूर्वक सहभागी हुन सबै राजनीतिक, उम्मेदवार र आम जनसमुदायलाई निर्वाचन आयोगले अपिल गरेको छ ।
तेस्रो चरणको स्थानीय तह निर्वाचन तयारीका विषयमा जानकारी दिन निर्वाचन आयोगमा आज आयोजित पत्रकारसम्मेलनमा प्रमुख निर्वाचन आयुक्त डा अयोधीप्रसाद यादवले असोज २ गते हुने स्थानीय तहको निर्वाचनका लागि उम्मेदवारी दर्ताको सम्पूर्ण तयारी पूरा भएको समस्त मतदाता, आमजनता, राजनीतिक दल र सरोकारवालालाई जानकारी गराएका छन् । तेस्रो चरणको स्थानीय तहको निर्वाचनलाई जनप्रतिनिधि चयन गर्ने उत्सवका रूपमा लिन सबै मतदातासँग आग्रह गर्दै उनले अघिल्ला दुईवटा निर्वाचन जस्तै शान्ति र सौहाद्र्रपूर्ण वातावरणमा व्यापक सहभागिता रहने अपेक्षा निर्वाचन आयोगले गरेको बताए । प्रमुख निर्वाचन आयुक्त डा यादवका अनुसार सबै राजनीतिक दलले निर्वाचनमा सहभागी हुने दावी गरे ।
सहज राजनीतिक वातावरण सिर्जना भएबाट वैशाख ३१ मा एकै चरणमा गर्ने भनिएको निर्वाचन चरणबद्ध रुपमा गर्नुको उद्देश्यसेमत पूरा भएको बताए । संविधानसभाबाट बनेको नेपालको संविधानलाई कार्यान्वयनका क्रममा हुन लागेको ऐतिहासिक निर्वाचन सम्पूर्ण राजनीतिक दल तथा स्वतन्त्र उम्मेदवारलाई उत्साहपूूर्वक विभिन्न पदमा उम्मेदवारी दर्ता गर्न पनि सो अवसरमा उनले आग्रह गरे । स्थानीय तहको तेस्रो चरणको निर्वाचनमा सिरहा, सप्तरी, धनुषा, महोत्तरी, सर्लाही, बारा, पर्सा र रौतहट जिल्लाका २६ लाख ६४ हजार ७९२ मतदातालाई उक्त मतदानको अधिकार रहेको छ । निर्वाचनमा एक महानगरपालिका, तीन उपमहानगरपालिका, ७३ नगरपालिका र ५९ गाउँपालिका गरी १३६ वटा स्थानीय तहमा निर्वाचन हुँदैछ । यो निर्वाचनबाट ६ हजार ६२७ जना प्रतिनिधि निर्वाचित हुनेछन् । यसका लागि दुई हजार १६६ मतदानस्थलमा तीन हजार ५७८ मतदान केन्द्र कायम गरिएको छ भने मतदान कार्यमा सुरक्षाकर्मी बाहेक ३१ हजार ५०० जना कर्मचारी खटिनेछन् ।
महिला, दलित, अल्पसंख्य कलगायत सबै उम्मेदवारको मनोनयन दर्ताका लागि मुख्य निर्वाचन अधिकृत र निर्वाचन अधिकृतले सम्पूर्ण व्यवस्थापन गरिसकेको उल्लेख गर्दै प्रमुख निर्वाचन आयुक्त डा यादवले उम्मेदवारी दर्ताका लागि सम्बन्धित स्थानीय तहको निर्वाचन अधिकृतको कार्यालयमा बिहान १० देखि ५ बजेसम्म समय तोकिएको पनि डा. यादवले बताए । संविधानले स्थानीय तहको निर्वाचनमा महिलाको प्रतिनिधित्वलाई सबैभन्दा बढी प्राथमिकतामा राखेको उल्लेख गर्दै आयोगले भनेको छ–दलका तर्फबाट उम्मेदवारी दिँदा नगरपालिकाको प्रमुख÷उपप्रमुख तथा गाउँपालिका अध्यक्ष÷उपाध्यक्षमध्ये ५० प्रतिशत महिला उम्मेदवार हुनैपर्ने प्रावधानलाई राजनीतिक दलले उत्साहपूर्वक लिएका छन् । कानुनीरुपमै वडा तहमा ४० प्रतिशत महिलाको प्रतिनिधित्व सुनिश्चितता गरिएको छ ।
संघीयता र समावेशी लगायतका संविधानमा समेटिएका जनताका चाहनालाई साकार पार्नका लागि आगामी निर्वाचनमा तराई–मधेसका मतदाताको उत्साहजनक सहभागिता रहने कुरामा आयोग विश्वस्त रहेको प्रमुख आयुक्त यादवले बताए । राजनीतिक दल तथा स्वतन्त्र उम्मेवारले निर्धक्क साथ उम्मेदवारी दर्ता गराउन आग्रह गर्दै आयोगले मनोनयन दर्ता कार्यमा अवरोध सिर्जना गर्ने, भड्काउने, बाधा–अड्चन खडा गर्ने क्रियाकलाप भएमा निर्वाचनमा खटिएका सुरक्षाकर्मीले त्यस्ता कार्यलाई तत्कालै निरुत्साहित गरी शान्ति सुरक्षा कायम गर्ने विश्वास व्यक्त गरे ।
निर्वाचनलाई स्वच्छ, स्वतन्त्र, निष्पक्ष, पारदर्शी तथा विश्वसनीय बनाउन निर्वाचन आचारसंहिता पूर्णरुपमा पालना गर्न गराउन सम्बन्धित सबै निकायलाई निर्देशन दिइसकेको बताउँदै आयोगले निर्वाचन आचारसंहिताको पूर्ण पालना सबै पक्षबाट हुने कुरामा आयोग ढुक्क रहेको बताइएको छ ।
