काठमाडौं, पुष १८। प्रतिनिधि सभा र प्रदेश सभाको निर्वाचन सकिएको एक महिना पश्चात राजनीतिक दलहरुले निर्वाचन आयोगमा बुझाएको लिस्ट सच्याउन निर्वाचन आयोगले प्रदेशसभातर्फ समानुपातिक उम्मेदवारको ६ राजनीतिक दलहरुलाई पत्राचार गरेको छ । नेपाली कांग्रेस, राजपा, संघीय समाजवादी फोरम नेपाल, राप्रपा, राष्ट्रिय जनमोर्चा र संघीय लोकतान्त्रिक राष्ट्रिय मञ्चलाई मंगलबार निर्वाचन आयोगले पत्राचार गरिएको हो । आयोगका अनुसार अन्य दलहरुको सूचीमा भने समस्या छैन ।
प्रवक्तादिनेश घिमिरेका अनुसार २० गतेभित्र दलहरुले सच्याएर सूची बुझाइसक्नुपर्ने छ । प्रवक्ता घिमिरेका अनुसार क्रमभंग भएको, समावेसी नभएको, महिला हुनुपर्नेमा पुरुष भएको लगायतका समस्या देखिएकाले संशोधित सूची बनाएर बुझाउनु पर्ने छ ।
२० गतेपछि सच्याउन भनेअनुसार भए-नभएको जाँचबुझ गर्ने र फेरि पनि त्रुटी देखिए ऐनअनुसार कारबाही प्रक्रिया अघि बढाउने घिमिरेले बताए । उनले भने, ‘ऐनको व्यवस्थाअनुसार भएको भए तुरुन्तै निर्णय गरिहाल्छौं तर समावेशी समूह नमिलेको वा आयोगले भनेअनुसार नभएमा निर्वाचित नगर्नेसम्मको व्यवस्था छ ।’
