काठमाडौं, पुष २८ । बलिउड सुपरस्टार सलमान खान यही फागुन २६ गते नेपाल आउने भएका छन् । सलमान झन्डै २३ वर्षपछि नेपाल आउन लागेका हुन् । उनी ‘दबंग द टुर’ अन्तर्गत नेपाल आउने भएका हुन् ।
सलमानलाई ओडीसी इन्टरटेन्मेन्टले नेपाल ल्याउन लागेको हो । आयोजक संस्थाले पटक–पटक सलमान नेपाल आउने जानकारी गराउँदै आएको भए पनि मुख नखोलेका सलमानले अहिले भने आफू नेपाल आउन लागेको जानकारी गराएका छन् ।
हालसालै यो टुरमा बलिउड अभिनेत्री कैटरीना कैफ पनि जोडिएकी छिन् । उनी नेपाल आउने वा नआउने भन्ने विषयमा भने अझैसम्म पनि टुंगो लागिसकेको छैन । ‘टाइगर जिन्दा हे’को सफलतापछि कैटरीना ‘दबंग द टुर’मा भित्रिएकी हुन् ।
सलमानसँगै फागुन २६ गते शनिवार टुँडिखेलमा हुने ‘दबंग द टुर नेपाल’मा बलिउड नायिका सोनाक्षी सिन्हा, अभिनेता, निर्देशक तथा कोरियोग्राफर प्रभु देवा, ज्याकलिन फर्नान्डिज, डेजी शाह, कृति सेनोन, मित ब्रदर्श, अभिनेता तथा उद्घोषक मनिष पलपनि सहभागी हुने भएका छन् ।
आफ्नो फिल्मी करिअरको सुरुवातको समयमा सलमान सन् १९९४ मा नेपाल आएका थिए ।
